දේශීය ව්‍යවසායකයන් නගා සිටුවීමට සහ ඔවුන්ට නව ව්‍යාපාරික අවස්ථා හඳුන්වා දීමට SDB බැංකුව දරන අඛණ්ඩ කැපවීම තහවුරු කරමින් “SDB ව්‍යාපාර ප්‍රතිභා 2025” වෙළෙඳ ප්‍රදර්ශනය අභිමානයෙන් පවත්වන ලදි. ඒ කොළඹ මහ නගර සභා පරිශ්‍රයේ කොළඹ නගර ශාලාව ඉදිරිපිට පිහිටි එෆ්. ආර්. සේනානායක මාවතේදීය. SDB බැංකුව විසින් ක්‍රියාත්මක කරන ග්‍රාමීය සංවර්ධන වැඩසටහනේ ප්‍රමුඛතම අංගයක් ලෙස පවත්වන ලද මෙම ප්‍රදර්ශනයට බස්නාහිර පළාත් ආණ්ඩුකාර හනීෆ් යූසෆ් මහතා, SDB බැංකුවේ සභාපතිනි දිනිති රත්නායක මහත්මිය. SDB බැංකුවේ විධායක අධ්‍යක්‍ෂ/ප්‍රධාන විධායක නිලධාරී කපිල ආරියරත්න මහතා සහ බැංකුවේ ආයතකික කළමනාකරණ මණ්ඩලය සහභාගී වූහ. 100කට අධික වූ සුවිශේෂී දේශීය ව්‍යවසායකයන්ගේ කුසලතා සහ නර්මාණශීලිත්වය නිරූපණය කරන ලද මෙම ප්‍රදර්ශනයට සම්ප්‍රදායික ආහාරපාන වර්ග, වියළි ආහාර වර්ග, පරිසර හිතකාමී නිෂ්පාදන, හස්ත කර්මාන්ත නිෂ්පාදන, බතික් නිෂ්පාදන ආදී විවිධාකාර නිෂ්පාදන ඉදිරිපත් වී තිබිණ.
SDB බැංකුවේ ග්‍රාමීය සංවර්ධන වැඩසටහන ශ්‍රී ලංකාව පුරා ව්‍යවසායකයන් සවිබල ගැන්වීම සඳහා විශාල දායකත්වයක් ලබා දී ඇත. සමූපකාර සමිති, ප්‍රාදේශීය ලේකම් කාර්යාල, රාජ්‍ය හා පෞද්ගලික අංශයේ ආයතන අතර සහයෝගීතාවයක් නිර්මාණය කිරීමට සමත් වූ මෙම වැඩසටහන හරහා රට පුරා විසිරී සිටින ව්‍යවසායකයින් 3000කට අධික ප්‍රමාණයකට සාර්ථකව මාර්ගෝපදේශ සපයා ඇත. මෙම වැඩසටහන යටතේ ව්‍යවසායකයන්ට වෙළෙඳ ප්‍රදර්ශන අත්දැකීමක් සමීප කිරීම සඳහා කුඩා පරිමාණ වෙළෙඳ ප්‍රදර්ශන කිහිපයක් සංවිධානය කරන ලද අතර ඉහළ ගුණාත්මක භාවයකින් යුතු නිෂ්පාදන එහිදී විකිණීම තුළින් සැළකිය යුතු ආදායමක් ද උපයා ගැනීමට ද ව්‍යවසායකයන්ට අවස්ථාව උදා විය. එහි එක් පියවරක් ලෙස පැවැත්වුණු “ව්‍යාපාර ප්‍රතිභා 2025” වෙළෙඳ ප්‍රදර්ශනය ඔස්සේ SDB බැංකුවේ අරමුණු සාධනය කරමින් දේශීය කුඩා පරිමාණ ව්‍යවසායකයන්ගේ නිෂ්පාදන හා වෙළෙඳ නාම ප්‍රවර්ධනයටත් ඔවුන්ට නව වෙළෙඳ අවස්ථා උදා කර දීමටත් හැකියාව ලැබිණ.
මෙහිදී SDB බැංකුව විසින් දේශීය ව්‍යවසායකයන්ගේ ව්‍යාපාර තව දුරටත් ප්‍රවර්ධනය කිරීම අරමුණු කර ගනිමින් Facebook Marketplaceහි ‘SDB ව්‍යාපාර ප්‍රතිභා Marketplace’ නමින් ප්‍රජා කණ්ඩායමක් ද දියත් කරන ලදි. මෙම නවෝත්පාදන වේදිකාව හරහා ව්‍යවසායකයින්ට සිය වෙළෙඳ ප්‍රචාරණයන් වඩාත් පුළුල් කරගන්නා අතරම සිය වෙළෙඳ ප්‍රවේශයන් පුළුල් කර ගැනීමටත් සිය නිෂ්පාදන විවිධත්වයෙන් යුතු ප්‍රජාවන්ට සමීප කරවීමටත් නව අවස්ථාවන් නිර්මාණය වේ.
“අපේ ග්‍රාමීය සංවර්ධන වැඩසටහන හුදෙක් ග්‍රාමීය සංවර්ධනයට සීමා වූවක් නෙවෙයි. එය ග්‍රාමීය ප්‍රජාව නගාසිටුවීම තුළින් දේශීය ව්‍යවසායකයන් සවිබල ගැන්වීමත් නවෝත්පාදන අවස්ථා බිහි කිරීමත් ජාතියේ ව්‍යවසායක කුසලතා ප්‍රවර්ධනය කිරීමත් අරමුණු කර ගත් දැවැන්ත ව්‍යාපෘතියක්. අපේ දේශීය ව්‍යවසායකයන්ගේ කුසලතා සහ නිර්මාණශීලීත්වයන් අගය කරන සහ පෝෂණය කරන බැංකුවක් වශයෙන් ඔවුන්ගේ ව්‍යාපාර සෑම අංශයකින්ම සංවර්ධනය කිරීමට අවශ්‍ය සහයෝගය ලබා දීමට හැකි වීම ගැන SDB බැංකුවේ අපි ආඩම්බර වෙනවා.” යැයි SDB බැංකුවේ විධායක අධ්‍යක්‍ෂ සහ ප්‍රධාන විධායක නිලධාරී කපිල ආරියරත්න මහතා ප්‍රකාශ කළේය.
මෙම වෙළෙඳ ප්‍රදර්ශනය සහ අලුතින් දියත් කරන ලද SDB ව්‍යාපාර ප්‍රතිභා Marketplace හරහා ශ්‍රී ලංකාවේ සංවර්ධන ක්‍රියාවලියේ දැවැන්ත කොටස්කරුවෙකු වීමේ SDB බැංකුවේ දැක්ම තවත් පුළුල් වී ඇත. ව්‍යාපාර සංවර්ධනය සඳහා නව වේදිකාවක් නිර්මාණය කිරීම තුළින් ව්‍යවසායකත්ව පරාසයන් පරිවර්තනයන්ට ලක් කිරීමේ හා පුළුල් කිරීමේ මෙහෙවර අඛණ්ඩව සිදු කරගෙන යාමට ද SDB බැංකුවට හැකි වනු ඇත.
SDB බැංකුව පිළිබඳව
වසර 27කට වැඩි කාලයක් ශ්‍රී ලංකාවේ බැංකු ක්ෂේත්‍රය තුළ විශාල සේවාවක් සිදු කර ඇති SDB බැංකුව පුද්ගලයන්ට සහ ව්‍යාපාරවලට ආරක්ෂිත සහ විශ්වාසනීය බැංකුකරණ විසඳුම් ලබා දීම සම්බන්ධයෙන් කීර්තියක් ලබා ඇත. SDB බැංකුව ශ්‍රී ලංකා මහ බැංකුව විසින් අධීක්ෂණය කරනු ලබන බලපත්‍රලාභී විශේෂිත බැංකුවක් වන අතර කොළඹ කොටස් වෙළෙඳපොලේ ප්‍රධාන මණ්ඩලයේ ලැයිස්තුගත කර ඇති, Fitch Ratings Sri Lanka විසින් ‘BB+(lka)’ ණය ශ්‍රේණිගත කිරීමක් සහිත බැංකුවකි. සුළු හා මධ්‍ය පරිමාණ ව්‍යාපාරිකයන්ට සහයෝගය ලබා දීමෙන් සහ කාන්තා ව්‍යවසායකත්වය සංවර්ධනය කිරීම සඳහා දායකත්වය ලබා දීමෙන් SDB බැංකුව මෙරට තිරසාර සංවර්ධනය සහ ආර්ථික උන්නතිය වෙනුවෙන් කැප වී සිටියි. මීට අමතරව නිපුණතා සංවර්ධන, ව්‍යවසායකත්ව, මාර්ගෝපදේශන සහ උපදේශන වැඩසටහන්වලින් සමන්විත වැඩමුළු ඔස්සේ සුළු හා මධ්‍ය පරිමාණ ව්‍යාපාරිකයන්ට මූල්‍ය සේවාවන්ට වැඩි යමක් ලබා දෙමින් ඉතිරි කිරීම සඳහා දිරිගැන්වීමටත් මෙරට ආර්ථික සංවර්ධනය වේගවත් කිරීමටත් SDB බැංකුව කැප වී සිටියි. සිය මූල්‍ය ක්‍රියාකාරකම්වලදී ව්‍යාපාරික ප්‍රමුඛතාවයන්ට අමතරව තිරසාර එළඹුමකින් කටයුතු කරමින් පාරිසරික, සමාජ සහ පරිපාලන තිරසාරත්වය වෙනුවෙන් කැපවීමෙන් කටයුතු කිරීම කෙරෙහි ද SDB බැංකුව සැළකිලිමත් වෙයි.
