DFCC බැංකුව මෙරට ප්රථම වරට නීල බැඳුම්කරයක් නිකුත් කරමින් නවෝත්පාදන සන්ධිස්ථානයක් සනිටුහන් කරයි. මෙය ශ්රී ලංකාවේ සමුද්රීය සහ වෙරළ ආශ්රිත සම්පත් ආරක්ෂා කිරීම සහ ඒවා තිරසාර අන්දමින් භාවිත කිරීම සඳහා වූ ව්යාපෘති සඳහා, මූල්ය ආධාර සැපයීමට වෙන් කරන ලද රුපියල් බිලියන 3 ක සමස්ත නිකුතුවකි.
ෆිච් රේටින්ග්ස් වෙතින් ‘A(EXP)(lka)’ ශ්රේණිගත කිරීමක් ලබා ගැනීමට අපේක්ෂිත මෙම පුරෝගාමී බැඳුම්කරය, පිරිසිදු පානීය ජල යටිතල පහසුකම්, තිරසාර සමුද්රීය ධීවර කර්මාන්තය සහ ජලජීවී වගාව, සාගර පාදක කොටගත් පුනර්ජනනීය බලශක්තිය, පරිසර හිතකාමී වෙරළබඩ සංචාරක ව්යාපාරය, අපජල කළමනාකරණය, වෙරළබඩ ප්රජාවන් සඳහා දේශගුණික විපර්යාසයන්ට අනුවර්තනය වීම සහ විධිමත් සමුද්රීය ගමනාගමනයන් වැනි ව්යාපෘති සඳහා සහාය වනු ඇත. තවද මෙම බැඳුම්කරය ජාත්යන්තර ප්රාග්ධන වෙළෙඳපොළ සංගමයේ (ICMA), හරිත, සමාජීය සහ තිරසාර මාර්ගෝපදේශයන්ට අනුගත වන අතර, විනිවිදභාවය, භාවිතයට ගැනෙන අරමුදල්වල පැහැදිලි බව සහ මැනිය හැකි ප්රතිඵල එහි හරය ලෙස අන්තර්ගත කරයි.
මෙරට ජනගහනයෙන් 30% කට ආසන්න ප්රමාණයක් වෙරළබඩ දිස්ත්රික්ක කේන්ද්ර කොටගෙන ජීවත් වන අතර, ධීවර කර්මාන්තය, සංචාරක ව්යාපාරය සහ වෙළෙඳාම සමඟ ඔවුන්ගේ ජීවනෝපාය බැඳී පවති. මෙම නීල බැඳුම්කරය ප්රාග්ධනය රැස්කිරීමකට වඩා වැඩි යමක් නියෝජනය කරන අතර එය මූල්ය වෙළෙඳපොළ පාරිසරික යථාර්ථයන් හා අනුගත වීමට සහාය වෙමින්, ජීවනෝපායන්, පරිසර පද්ධති සහ දිගුකාලීන ඔරොත්තු දීමේ හැකියාව සුරක්ෂිත කිරීමට අත්වැලක් සපයයි.
මෙම මුලපිරීම DFCC බැංකුවේ තිරසාර මූල්යකරණය සහ ජාතික මට්ටමෙන් ප්රථමයන් නිකුත් කිරීම සඳහා වූ සුවිශේෂී උරුමය මත ගොඩනැගේ. 1996 දී මෙරට ප්රථම, ජාතික විදුලිබල පද්ධතිය හා සම්බන්ධ කුඩා ජල විදුලි ව්යාපෘතියට මූල්ය ආධාර සැපයීමෙන් පසුව, බැංකුව විසින් සුළං, සූර්ය සහ කසළ භාවිතකොට සිදුකරන බලශක්ති ව්යාපෘති ඇතුළු පුනර්ජනනීය බලශක්ති ව්යාපෘති සඳහා අඛණ්ඩව සහාය වී ඇත.
2024 දී DFCC බැංකුව කොළඹ කොටස් වෙළෙඳපොළේ, ලක්සම්බර්ග් හරිත විනිමය හුවමාරුවේ සහ ඉන්දියාවේ GIFT City හි NSE ජාත්යන්තර විනිමය හුවමාරුවේ ලැයිස්තුගත කරන ලද ශ්රී ලංකාවේ ප්රථම හරිත බැඳුම්කරය නිකුත් කරන ලදී. නීල බැඳුම්කරය මෙම ගමන් මග තවදුරටත් පුළුල් කරමින්, මූල්ය නවෝත්පාදනය සමුද්රීය පරිසර පද්ධති වෙත යොමු කරන අතර, තිරසාරභාවය කේන්ද්ර කර ගත් සංවර්ධනයක් සඳහා වූ බැංකුවේ වසර 70ක ගමන්මග තහවුරු කරයි.
DFCC බැංකුවේ ප්රධාන විධායක නිලධාරී, තිමල් පෙරේරා මහතා මෙසේ ප්රකාශ කළේය: “DFCC බැංකුව වන අප තබන්නාවූ සෑම පියවරකින්ම, ශ්රී ලංකාව ඉහළම ජාත්යන්තර ප්රමිතීන්ට ලඟාවන බව සනාථ කර පෙන්වයි. අපගේ නීල බැඳුම්කරය එම ගමන්මගේ අඛණ්ඩතාවය තවදුරටත් තහවුරු කරනවා. තවද මෙරට ප්රථම නීල බැඳුම්කරය සමඟින්, සාගර, ජල මාර්ග සහ ඒවා මත යැපෙන ප්රජාවන් කෙරෙහි පවත්නා අපගේ අවධානය තවදුරටත් ශක්තිමත් කරනවා”
මෙම නිකුතුවත් සමඟ, සීෂෙල්ස්, ෆීජි, ඉක්වදෝරය සහ ඉන්දුනීසියාව සමඟින්, සාගර පරිසර පද්ධති ආරක්ෂා කිරීමට ප්රාග්ධන වෙළෙඳපොළ උපයෝගී කර ගන්නා කුඩා, නමුත් වර්ධනය වන රටවල් සමූහයට ශ්රී ලංකාව ද එක් වේ.
DFCC බැංකුවට වසර 70 ක් සපිරෙන මේ මොහොතේ, සංවර්ධනය සහ පරිසර කළමනාකරණය යනු එකිනෙකට තරඟකාරී ඉලක්ක නොව, අනුපූරක අවශ්යතා බව නීල බැඳුම්කර නිකුතුව තුළින් අවධාරණය කරයි. කෙසේ වෙතත්, සැබෑ කතාව දිගහැරෙන්නේ වෙළෙඳපොළේ හෝ ශ්රේණිගත කිරීම්වල නොව, පිරිසිදු වරායන් සහිත ධීවර ගම්මාන, දේශගුණික අවදානම්වලට අනුවර්තනය වන වෙරළබඩ ප්රජාවන්, කොරල්පර ආරක්ෂා කරන සංචාරක මෙහෙයුම්කරුවන් සහ ආරක්ෂිත පානීය ජලය ලබන නිවාස තුළින් වනු ඇත.
DFCC බැංකුව පිළිබඳව
ශ්රී ලංකාවේ ප්රමුඛතම මූල්ය ආයතනයක් වන DFCC බැංකුව 1955 වසරේදී ස්ථාපිත කරන ලද අතර, 1956 වසරේ සිටම එය කොළඹ කොටස් හුවමාරුවේ ලියාපදිංචි වී සිටී. ශ්රී ලංකා මහ බැංකුව විසින් නියාමනය කරනු ලබන එය Fitch Ratings වෙතින් A (lka) ශ්රේණිය හිමි කරගෙන තිබේ. DFCC බැංකුව විසින් පාරිභෝගික, ආයතනික හා සුළු හා මධ්යම පරිමාණ බැංකු සේවාවන් මෙන්ම භාණ්ඩාගාර, ආයෝජන සහ වෙළඳ මූල්ය සේවා ඇතුළු සේවාවන් රාශියක් පිරිනමනු ලබයි. පාරිභෝගික කේන්ද්රීයත්වය හා තිරසාරත්වය උදෙසා මුල් තැන දෙන DFCC බැංකුව DFCC MySpace වැනි ඩිජිටල් සේවාවන් ඇතුළු ක්රම රාශියක් ඔස්සේ කාර්යක්ෂම හා සුරක්ෂිත ලෙස සිය සේවාවන් පිරිනමන අතර, දිවයින පුරා ශාඛා 137 ක්ද පිහිටුවා ඇත. මීට අමතර එම බැංකුවේ ගනුදෙනුකරුවන්ට LankaPay ජාලය හරහා ATM යන්ත්ර 5,500 කට අධික සංඛ්යාවක් භාවිතා කළ හැකි වේ.
තිරසාර මූල්යකරණය සහ පුනර්ජනනීය බලශක්තිය සම්බන්ධ පිළිගත් ප්රමුඛයෙකු වන DFCC බැංකුව, පාරිසරික බලපෑම් අවම කරමින් ආර්ථිකයේ දීර්ඝකාලීන ඔරොත්තු දීමේ හැකියාව වර්ධනය කිරීම සඳහා කැප වී සිටී.
