DFCC බැංකුව, ශ්රී ලංකාවේ පොදු ප්රවාහන ජාලය වෙත සිය ඩිජිටල් ගෙවීම් පහසුකම් හඳුන්වා දීමට පියවර ගෙන ඇති අතර මේ යටතේ DFCC බැංකුවේ POS (Point of Sale) යන්ත්ර හරහා QR කේත, ක්රෙඩිට් සහ ඩෙබිට් කාඩ්පත් මගින් බස් රථ ගාස්තු ගෙවීමේ පහසුකම සලසා දී තිබේ. ප්රවාහන අමාත්යාංශය විසින් ආරම්භ කර ඇති, ප්රවාහන ගාස්තු අයකර ගැනීමේ ක්රමවේදය නවීකරණය කිරීමේ සහ ප්රවාහන ක්ෂේත්රය මුදල් භාවිතයෙන් තොර මෙහෙයුම් ආකෘතියක් වෙත යොමු කිරීමේ ජාතික වැඩපිළිවෙලට මෙම මුලපිරීම සුවිශේෂී දායකත්වයක් සපයයි.
මෙම ව්යාපෘතියේ කොටසක් ලෙස, ප්රවාහන අමාත්යාංශය විසින් නිකුත් කර ඇති මෙහෙයුම් මාර්ගෝපදේශවලට අනුකූලව බස් රථ හිමියන්ට සහ රාජකාරිවල නිරත මහත්වරුන් වෙත POS යන්ත්ර ලබා දීමට DFCC බැංකුව කටයුතු කරයි. මෙම සෑම POS යන්ත්රයක්ම අමාත්යාංශයේ තාක්ෂණික සහ නියාමන ප්රමිතීන්ට අදාල වන නව මෘදුකාංග පද්ධතියකින් සමන්විත වන අතර, එමගින් ආරක්ෂිතව සහ ඉක්මණින් ගාස්තු අයකර ගැනීමටත්, බස් රථ තුළ කාර්යයන්හි කාර්යක්ෂමතාව ඉහළ නැංවීමටත් හැකියාව ලැබේ. තවද, සහතික ලත් ප්රවේශපත්ර මෘදුකාංග සේවා සපයන්නන් සහ දෘඩාංග හවුල්කරුවන් සමඟ එක්ව, දෛනික බස් රථ මෙහෙයුම් සඳහා විසඳුමක් ලෙස ඉලෙක්ට්රොනික ප්රවේශපත්ර නිකුත් කිරීමේ යන්ත්ර (ETIM) පහසුකම ද බැංකුව විසින් ලබාදෙයි.
මේ පිළිබඳව අදහස් දක්වමින් DFCC බැංකුවේ ජ්යෙෂ්ඨ උප සභාපති/ පුද්ගල සහ ව්යාපාර බැංකුකරණ අංශ ප්රධානී ආසිරි ඉද්දමල්ගොඩ මහතා මෙසේ පැවසීය. “ශ්රී ලංකාවේ බස් රථ ජාලය නව ඩිජිටල් පහසුකම් සහිත නව අවධියක් කරා ගෙන යාමට ප්රවාහන අමාත්යාංශය ගනු ලබන ප්රයත්නයට සහාය වීමට ලැබීම DFCC බැංකුවට ඉමහත් අභිමානයක්. බස් රථ තුළ කාඩ්පත් මගින් ගෙවීම් කිරීමේ හැකියාව ලබා දීම හරහා මගීන්ට වඩාත් ආරක්ෂිත සහ පහසු ගෙවීම් ක්රමයක් හිමිකර දීමට අපි කටයුතු කරන්නෙමු. එමෙන්ම, ප්රවාහන සේවයේ නිරත වන මහත්වරුන්ට තම දෛනික ගනුදෙනු කළමනාකරණය කරගැනීම සඳහා ආරක්ෂිත සහ කාර්යක්ෂම ක්රමවේදයක් ද මේ හරහා හිමිවනු ඇත.”
මෙම සහයෝගීතාවය, අත්යවශ්ය සේවා අංශ හරහා ඩිජිටල් ගෙවීම් ක්රම ප්රචලිත කිරීමේ DFCC බැංකුවේ පුළුල් උපායමාර්ගික සැලැස්මේ කොටසකි. විවිධ ක්ෂේත්රයන්හි POS යන්ත්ර බහුලව ස්ථාපිත කර ඇති බැංකුවක් ලෙස, රජයේ දිගුකාලීන ඩිජිටල් ආර්ථික සැලැස්මට සමගාමීව පොදු ප්රවාහන ක්ෂේත්රය වෙත ද බැංකුව සිය ගෙවීම් පහසුකම් මෙලෙස ව්යාප්ත කර ඇත.
බස් රථ සඳහා ඩිජිටල් ගෙවීම් හඳුන්වා දීම තුළින් මුදල් භාවිතයෙන් තොර ප්රවාහනය සඳහා වන ප්රවණතාව වේගවත් වනු ඇතැයි අපේක්ෂා කෙරේ. එමගින් මගීන්ට වඩාත් වේගවත්, ආරක්ෂිත සහ පහසු ගෙවීම් හැකියාවක් හිමිවන අතරම, ශ්රී ලංකාවේ සමස්ත ප්රවාහන පද්ධතිය තුළ මෙහෙයුම් කාර්යක්ෂමතාව ඉහළ නැංවීමට ද මෙය ඉවහල් වනු ඇත.
DFCC බැංකුව පිළිබඳව
ශ්රී ලංකාවේ ප්රමුඛතම මූල්ය ආයතනයක් වන DFCC බැංකුව 1955 වසරේදී ස්ථාපිත කරන ලද අතර, 1956 වසරේ සිටම එය කොළඹ කොටස් හුවමාරුවේ ලියාපදිංචි වී සිටී. ශ්රී ලංකා මහ බැංකුව විසින් නියාමනය කරනු ලබන එය Fitch Ratings වෙතින් A (lka) ශ්රේණිය හිමි කරගෙන තිබේ. DFCC බැංකුව විසින් පාරිභෝගික, ආයතනික හා සුළු හා මධ්යම පරිමාණ බැංකු සේවාවන් මෙන්ම භාණ්ඩාගාර, ආයෝජන සහ වෙළඳ මූල්ය සේවා ඇතුළු සේවාවන් රාශියක් පිරිනමනු ලබයි.
පාරිභෝගික කේන්ද්රීයත්වය හා තිරසාරත්වය උදෙසා මුල් තැන දෙන DFCC බැංකුව DFCC MySpace වැනි ඩිජිටල් සේවාවන් ඇතුළු ක්රම රාශියක් ඔස්සේ කාර්යක්ෂම හා සුරක්ෂිත ලෙස සිය සේවාවන් පිරිනමන අතර, දිවයින පුරා ශාඛා 133 ක්ද පිහිටුවා ඇත. මීට අමතර එම බැංකුවේ ගනුදෙනුකරුවන්ට LankaPay ජාලය හරහා ATM යන්ත්ර 5,500 කට අධික සංඛ්යාවක් භාවිතා කළ හැකි වේ.
තිරසාර මූල්යකරණය සහ පුනර්ජනනීය බලශක්තිය සම්බන්ධ පිළිගත් ප්රමුඛයෙකු වන DFCC බැංකුව, පාරිසරික බලපෑම් අවම කරමින් ආර්ථිකයේ දීර්ඝකාලීන ඔරොත්තු දීමේ හැකියාව වර්ධනය කිරීම සඳහා කැප වී සිටී.
