2026 ජුනි 19 කොළඹදීය: ශ්රී ලංකා තත්ත්ව සහ ඵලදායිතා අභිවර්ධනය කිරීමේ සංගමය (SLAAQP) විසින් සංවිධානය කරන ජාතික තත්ත්ව සහ ඵලදායිතා සමුළුව (NCQP) 2026 ජුනි 17 වන දින කොළඹ මවුන්ට් ලැවීනියා හෝටලයේදී සාර්ථකව පැවැත්විණි. මෙම අවස්ථාවට සංවිධාන 100කට අධික සංඛ්යාවක නියෝජිතයින් 2,000කට අධික ප්රමාණයක් සහභාගී වූ අතර, එය මේ දක්වා පැවති විශාලතම සමුළුව බවට පත්විය.
“නොසැලෙන ශ්රී ලංකාවක් සඳහා ජනතා කේන්ද්රීය ගුණාත්මකභාවය සහ ඵලදායිතාවය” යන්න තේමාව කරගනිමින් පවත්වන ලද NCQP 2026 හරහා ආයතනික විශිෂ්ටත්වය, නවෝත්පාදනය සහ දිගුකාලීන තරඟකාරිත්වය මෙහෙයවීමේදී ජනතාව ඉටු කරන තීරණාත්මක කාර්යභාරය ඉස්මතු කළේය. මෙම සමුළුවේදී විවිධ කර්මාන්ත ක්ෂේත්රයන් නියෝජනය කරන වැඩිදියුණු කිරීමේ කණ්ඩායම් 450ක් ඇගයීමට ලක් කරන ලදි. තත්ත්ව පාලන කව, ලීන් සික්ස් සිග්මා (LSS), තත්ත්ව වැඩිදියුණු කිරීමේ කණ්ඩායම්, අන්තර් ක්රියාකාරී කණ්ඩායම් සහ කයිසන් (Kaizen) ඇතුළු කාණ්ඩ කිහිපයක් යටතේ මෙම කණ්ඩායම් සඳහා රන්, රිදී සහ ලෝකඩ සම්මාන පිරිනැමිණි.
මෙම උත්සවයේ ප්රධාන ආරාධිත අමුත්තා ලෙස අපනයන සංවර්ධන මණ්ඩලයේ සභාපති සහ ප්රධාන විධායක නිලධාරී මංගල විජේසිංහ මහතා සහභාගී වූ අතර ගෞරවනීය අමුත්තන් ලෙස ලංකා හොස්පිට්ල්ස් පී.එල්.සී හි සමූහ ප්රධාන විධායක නිලධාරී වෛද්ය සංජය රත්නායක සහ ශ්රී ලංකා ප්රමිති ආයතනයේ (SLSI) සභාපති මහාචාර්ය තීක්ෂණ සුරවීර යන මහත්වරුන් සහභාගී විය.
මෙම උත්සවයේදී තෝරාගත් වැඩිදියුණු කිරීමේ ව්යාපෘති දෙකක් සඳහා සමුළුවේ ඉහළම සම්මානය වන වසරේ හොඳම ව්යාපෘති සඳහා ලබා දෙන “සුනිල් ජී. විජේසිංහ තත්ත්ව පාලන කව විශිෂ්ටතා සම්මානය” ප්රදානය කරන ලදි. මෙම වසරේදී මෙසේ සම්මානයෙන් පිදුම් ලැබුවේ MAS BODY WEAR – Casual line අංශයේ ‘Threadx’ කණ්ඩායම සහ Elastomeric Engineering PVT LTD හි ‘සවිය’ කණ්ඩායම විසිනි.
SLAAQP හි සභාපති සජීව රණසිංහ මහතා මෙසේ පැවසීය: “වසර ගණනාවක් පුරා, NCQP ශ්රී ලංකාවේ හොඳම ක්රමවේදයන් හුවමාරු කරගැනීම, විශිෂ්ටත්වය හඳුනා ගැනීම මෙන්ම අඛණ්ඩව වැඩිදියුණු කිරීම් ප්රවර්ධනය කිරීම සඳහා වැදගත්ම වේදිකාවක් බවට පත්ව ඇත. ජාතික සංවර්ධනයේ ප්රධාන ධාවකයන් ලෙස ගුණාත්මකභාවය, ඵලදායිතාව සහ ආයතනික විශිෂ්ටත්වය සඳහා ක්ෂේත්ර අතර ඇති කැපවීමේ වර්ධනය මෙම වසරේ දක්නට ලැබුණු ශක්තිමත් සහභාගීත්වය මගින් පිළිබිඹු කරයි.”
උත්සවය අමතමින් NCQP 2026 හි සභාපතිනි සකුන්තලා ගුණතිලක මහත්මිය මෙසේ පැවසීය: “තම සංවිධාන තුළ ගුණාත්මකභාවය සහ ඵලදායිතා ක්රියාකාරීත්වය ඉදිරියට ගෙන යාමට ජනතාව බලගැන්වීමේ වැදගත්කම NCQP 2026 මඟින් නැවතත් තහවුරු කර ඇත. සහභාගී වූ කණ්ඩායම් විසින් පෙන්නුම් කරන ලද උද්යෝගය, නවෝත්පාදනය සහ කැපවීම මගින් නොසැලෙන තරඟකාරී අනාගතයක් ගොඩනැගීම සඳහා ශ්රී ලංකාව පුරා පවතින දැවැන්ත ශක්තීන් නිරූපණය විය. ”
1989 දී ආරම්භ කරන ලද ශ්රී ලංකා තත්ත්ව කව සංගමයේ අනුප්රාප්තිකයා ලෙස 1996 දී පිහිටුවන ලද ශ්රී ලංකා තත්ත්ව සහ ඵලදායිතා අභිවර්ධනය කිරීමේ සංගමය, රට පුරා පවතින ගුණාත්මක ප්රමිතීන්, මෙහෙයුම් කාර්යක්ෂමතාවය සහ ව්යාපාර විශිෂ්ටත්වය දියුණු කිරීම සඳහා කැපවී සිටින ලාභ නොලබන සංවිධානයකි. දශක තුනකට අධික කාලයක් පුරා, තත්ත්ව පාලන කව (QCC), කයිසන් (Kaizen), ලීන් සික්ස් සිග්මා (Lean Six Sigma), සමස්ත තත්ත්ව කළමනාකරණය (Total Quality Management – TQM) සහ අනෙකුත් අඛණ්ඩ වැඩිදියුණු කිරීමේ ක්රමවේදයන් ඇතුළු ගෝලීය වශයෙන් පිළිගත් ක්රමවේදයන් වෘත්තිකයන් සහ ආයතන වෙත හඳුන්වා දෙමින්, SLAAQP ජාතික තත්ත්ව හා ඵලදායිතා ඉහළ නැංවීමේ පුරෝගාමියා බවට පත්වී ඇත.
NCQP, Ayano Total Quality Management (TQM) විශිෂ්ටතා සම්මානය, හරිත ඵලදායිතා සම්මාන සහ එහි වාර්ෂික ජාත්යන්තර පර්යේෂණ සමුළුව වැනි ප්රමුඛ වැඩසටහන් හරහා විශිෂ්ටත්වය හඳුනා ගැනීම, දැනුම බෙදා ගැනීම සහ සංවිධාන දිරිමත් කිරීම සඳහා විධිමත් ක්රමවේදයන් අනුගමනය කිරීමට අවශ්ය ජාතික මට්ටමේ වේදිකාවක් ගොඩනැගීමට SLAAQP උපකාරී වී තිබේ.
ගෝලීය වශයෙන් සම්බන්ධිත සංවිධානයක් ලෙස, ගුණාත්මකභාවය සඳහා වූ ආසියානු ජාලය (ANQ), ජාත්යන්තර තත්ත්ව පාලන කවයන් පිළිබඳ සම්මේලනය (ICQCC), ජපන් විද්යාඥයින් සහ ඉංජිනේරුවන්ගේ සංගමය (JUSE), සික්ස් සිග්මා කළමනාකරණ ආයතනය (SSMI) වැනි ප්රමුඛ ජාත්යන්තර ආයතන සමඟ SLAAQP ශක්තිමත් සහයෝගීතාවයන් පවත්වාගෙන යයි. මෙම සහයෝගීතාවයන් හරහා ශ්රී ලාංකික වෘත්තිකයන් සහ සංවිධාන හොඳම ගෝලීය ක්රියාමාර්ගයන්, ජාත්යන්තර ඉගෙනුම් අවස්ථා මෙන්ම තත්ත්ව හා ඵලදායිතාව පිළිබඳ දියුණු වෙමින් පවතින ක්රමවේදයන් සමඟ නිරන්තරයෙන් සම්බන්ධ කරයි.
MAS Holdings (Pvt) Ltd, Vibrant Events (Pvt) Ltd, Gislaved Gummi Lanka (Pvt) Ltd, GPV Lanka (Pvt) Ltd, ආචාර්ය මයිකල් ජේ. හැරී සික්ස් සිග්මා කළමනාකරණ ආයතනය (SSMI, USA), TV දෙරණ/ අද දෙරණ, නේෂන්ස් ට්රස්ට් බැංකුව, M & R Consolidated Private Limited, Lanka Hospitals Corporation PLC සහ Sunshine Holdings PLC යන ආයතනවල සහයෝගය NCQP 2026 සඳහා හිමිවූ අතර එම දායකත්වයත් සමඟ මෙතෙක් පැවති විශාලතම සමුළුව ලෙස වැඩසටහන සාර්ථක කරගැනීමට හැකි විය.
