ශ්‍රී ලංකාවේ සිංහල සාහිත්‍ය ක්ෂේත්‍රයේ ජනප්‍රිය ලේඛිකාවක වන නර්මදා රංගොඩගේ මහත්මියගේ අලුත්ම නවකථාව වන ‘REBORN’ කෘතිය එළිදැක්වීමේ උත්සවය පසුගිය අගෝස්තු 15 වන දා කොළඹ මහවැලි කේන්ද්‍රයේදී පැවැත්විණි. තම හිමිකාරිත්වයෙන් යුත් “අක්ෂර” ප්‍රකාශන ආයතනයේ ප්‍රකාශනයක් ලෙස මෙම කෘතිය එළිදැක්වීම සිදු කිරීම උත්සවයේ සුවිශේෂීත්වයක් විය.
පාසල් වියේ පටන්ම නිර්මාණාත්මක ලේඛණයට ඇල්මක් දැක්වූ නර්මදා රංගොඩගේ මහත්මිය 2016 වර්ෂයේ ෆේස්බුක් අවකාශයට එක් කළ “බාඳුරා” නවකතාව 2021 වර්ෂයේදී කෘතියක් ලෙස එළිදක්වමින් නවකතාකරණයට එක් වූ අතර අගරැජින, උතාරා, පරිචාරිකා, සාෂා, ලිය තඹර, ප්‍රේමාරම්මණ, නීලෝත්පලා සහ කාමච්ඡන්ද යන කෘතීන් ඇයගේ නව කතා ගොන්නට ඇතුළත් වේ. පාඨකයන්ට අපූරු කියවීමකට මග පාදමින් මෙවර එළිදැක්වූ ‘REBORN’ කෘතිය ඇයගේ දසවන නව කතා එළිදැක්වීම වේ.
ශ්‍රී ලංකා පොත් ප්‍රකාශකයන්ගේ සංගමයේ සභාපති අතුල ජයකොඩි, එම සංගමයේ ලේකම් ලසිත උමගිලිය, සරසවි ප්‍රකාශන ආයතනය, සුමිත්‍රා රාහුබද්ධ, දර්ශනා ශම්මි විජේතිලක, චන්දි කොඩිකාර, මොහාන් රාජ් මඩවල ඇතුළු ජනප්‍රිය ලේඛක ලේඛිකාවන්, පාඨකයින්, පොත් ප්‍රකාශන ආයතන මෙන්ම සාහිත්‍ය ක්ෂේත්‍රයේ පුරෝගාමීන් විශාල පිරිසක් මෙම අවස්ථාවට සහභාගී වූ අතර විචිත්‍රවත් ගීත සහ ආරාධිතයන්ගේ අර්ථවත් ආමන්ත්‍රණයන්ගෙන් උත්සවය වර්ණවත් විය.
උත්සවයේ දී අදහස් දක්වමින් නර්මදා රංගොඩගේ මහත්මිය කියා සිටියේ “සාහිත්‍යට පොත පතට වඩාත් ඇල්මක් දක්වන කෙනෙක් විදියට පාඨක ප්‍රජාවට දසවැනි නවකතාවත් ඉදිරිපත් කිරීමට ලැබීම මම මහත් භාග්‍යක් කොට සලකනවා. ඒ වගේම මා වැනිම තවත් ලේඛක, ලේඛිකාවන්ට තමන්ගෙ නිර්මාණයන් ප්‍රකාශනය සඳහා ‘අක්ෂර’ ප්‍රකාශන ආයතනය හරහා ඉදිරියේදී අවස්ථාව ලබාදීමට අපි බලාපොරොත්තු වෙනවා. ‘REBORN’ කෘතිය රස විඳින අතරම, නව නිර්මාණ අත්පිටපතකට පමණක් සීමා නොකර පාඨක ප්‍රජාවට කෘතියක් ලෙස ඉදිරිපත් කරන්න අප හා එක්වන්නැයි මම ලේඛක, ලේඛිකාවන්ට ආරාධනා කරනවා” යනුවෙන් ය.
‘නව කතාවක ඇරඹුම’ යන්න තම තේමා පාඨය කරගනිමින් ආරම්භ වූ “අක්ෂර” පොත් ප්‍රකාශන ආයතනය ‘REBORN’ නව කතාව ප්‍රකාශයට පත් කරමින් තම නවකතාකරණයට අත්පොත් තැබුවේය. ගුණාත්මක කියවීමක් වෙනුවෙන් අර්ථාන්විත කතා නිර්මාණ ප්‍රකාශනය, ලේඛකයන් දිරිගැන්වීම මෙන්ම දියුණු පාඨකාගාරයක් නිර්මාණය කිරීමට එම ආයතනය කැපවීසිටියි.
නර්මදා රංගොඩගේ මහත්මිය ග්‍රන්ථ රචනයෙන් මෙතෙක් ශ්‍රී ලංකා සාහිත්‍යට සිදු කළ සේවාවෙන් ඔබ්බට ගොස් නිර්මාණකරුවන්ගේ ග්‍රන්ථ නිර්මාණ සඳහා ඉඩ ප්‍රස්ථා පුළුල් කර ඇති අතර තම ප්‍රකාශන ආයතනය හරහා ඉදිරියට නිකුත්වන ග්‍රන්ථ රස විඳීමට, දැනුම ගවේෂණයට මෙන්ම ලේඛකයින් ලෙස නිර්මාණකරනයට පිවිසීමට පොත පතට හිතැති ඔබට ආරාධනා කරයි.
