යතුරුපැදි හා ත්‍රීරෝද රථ කර්මාන්තයට දක්ෂ වෘත්තිකයන් බිහි කිරීමේ තවත් පියවරක්
ශ්‍රී ලංකාවේ යතුරුපැදි හා ත්‍රීරෝද රථ කර්මාන්තයට අවශ්‍ය තාක්ෂණික දැනුම සහ වෘත්තීය කුසලතා වර්ධනය කිරීමේ අරමුණින්, TVS ලංකා පුද්ගලික සමාගමේ TVS Knowledge Center හි දෙවැනි පුහුණු මධ්‍යස්ථානය රාගමදී විවෘත කෙරිණි.
නව මධ්‍යස්ථානය මඟින් කාර්මික ශිල්පීන්, අලෙවි හා සේවා කණ්ඩායම් සහ කර්මාන්තයට පිවිසීමට අපේක්ෂා කරන තරුණ තරුණියන් සඳහා ප්‍රායෝගික පුහුණුව ලබාදීමට සැලසුම් කර ඇත. මෙම මධ්‍යස්ථානය විවෘත කිරීම, TVS Knowledge Center මඟින් ක්‍රියාත්මක කරන දිගුකාලීන පුහුණු වැඩසටහන් තවදුරටත් පුළුල් කිරීමේ වැදගත් පියවරක් වනු ඇත.
කොළඹ 14 සිට රාගම දක්වා
TVS Knowledge Center හි පළමු පුහුණු මධ්‍යස්ථානය 2024 වසරේදී කොළඹ 14 ප්‍රදේශයේ ආරම්භ කෙරිණි. TVS බලයලත් අලෙවි හා සේවා නියෝජිතයන්, පෞද්ගලික ගරාජ් කාර්මික ශිල්පීන් (PGM), සමාගමේ සේවකයන් සහ අනෙකුත් අදාළ පාර්ශ්වයන් සඳහා ක්‍රමවත් පුහුණුවක් ලබාදීම එහි මූලික අරමුණ විය.
එතැන් සිට තාක්ෂණික පුහුණුව, නිෂ්පාදන දැනුම, සේවා කටයුතු, දෝෂ හඳුනාගැනීම හා විසඳීම, නව තාක්ෂණය, අලෙවි කුසලතා, ව්‍යවසායකත්වය සහ වෘත්තීය සංවර්ධනය ආවරණය වන පුහුණු වැඩසටහන් රැසක් මෙම මධ්‍යස්ථානය මඟින් ක්‍රියාත්මක කර ඇත.
එම ගමනේ වැදගත් සන්ධිස්ථානයක් වූයේ තෘතීයික හා වෘත්තීය අධ්‍යාපන කොමිෂන් සභාවේ (TVEC) අනුමැතිය ලත් පුහුණු මධ්‍යස්ථානයක් බවට පත්වීම සහ NVQ Level 4 සුදුසුකම් පිරිනැමීම සඳහා අවශ්‍ය අනුමැතිය හිමිකර ගැනීමයි. TVS Knowledge Center හි තොරතුරු අනුව, යතුරුපැදි කර්මාන්තය සඳහා මෙවැනි පිළිගත් පුහුණුවක් සහ NVQ Level 4 වැඩසටහනක් හඳුන්වා දීම, ශ්‍රී ලංකාවේ යතුරුපැදි හා ත්‍රීරෝද රථ කර්මාන්තයේ නියුතු සමාගමක් අතුරින් කල පළමු පළමු අවස්ථාව ලෙස සැලකේ.
මෙම වැඩසටහන් මඟින් කාර්මික ශිල්පීන්ට තම ප්‍රායෝගික අත්දැකීම් තවදුරටත් වර්ධනය කරගැනීමටත්, ජාතික වශයෙන් පිළිගත් වෘත්තීය සුදුසුකමක් ලබාගැනීමටත් අවස්ථාව සැලසේ. ඒ අනුව, 2025 වසරේ කොළඹ බණ්ඩාරනායක අනුස්මරණ ජාත්‍යන්තර සම්මන්ත්‍රණ ශාලාවේ (BMICH) පැවති සහතික පිරිනැමීමේ උත්සවයේදී සුදුසුකම් සපුරාගත් කාර්මික ශිල්පීන් 225 දෙනෙකුට NVQ සුදුසුකම් පිරිනමන ලදී. දිගුකාලීන ප්‍රායෝගික අත්දැකීම් ඇති කාර්මික ශිල්පීන්ගේ වෘත්තීය හැකියාවන්ට ජාතික මට්ටමේ පිළිගැනීමක් ලබාදීමට එය වැදගත් අවස්ථාවක් විය.
නවීන පහසුකම් සමඟ ප්‍රායෝගික පුහුණුව
රාගම පුහුණු මධ්‍යස්ථානය යතුරුපැදි හා ත්‍රීරෝද රථ සඳහා විශේෂිත නවීන තාක්ෂණික උපකරණ සහ පුහුණු පහසුකම්වලින් සමන්විත වේ. නවීන වාහන පද්ධති, ප්‍රායෝගික සේවා කටයුතු, දෝෂ හඳුනාගැනීම හා විසඳීම, නව පරම්පරාවේ වාහන තාක්ෂණය, නිෂ්පාදන දැනුම සහ ගුණාත්මක පාරිභෝගික සේවාව එහි පුහුණු වැඩසටහන් මඟින් ආවරණය කිරීමට සැලසුම් කර ඇත.
ඉදිරියේදී ත්‍රීරෝද රථ කාර්මික ශිල්පීන් සඳහාද NVQ සුදුසුකම් ලබාදීමේ වැඩසටහන් ආරම්භ කිරීම TVS Knowledge Center හි තවත් අරමුණකි.
වෘත්තීය පුහුණුව කර්මාන්තයේ සැබෑ අවශ්‍යතා සමඟ සම්බන්ධ කිරීම සඳහා TVS Knowledge Center විවිධ අධ්‍යාපන හා වෘත්තීය පුහුණු ආයතන සමඟ එක්ව කටයුතු කරයි. වෘත්තීය පුහුණු අධිකාරියේ (VTA) පුහුණු මධ්‍යස්ථාන, ජර්මානු කාර්මික අභ්‍යාස ආයතනය (German Tech), තාක්ෂණික විද්‍යාල, යුද හමුදා තාක්ෂණික පුහුණු වැඩසටහන් සහ අනෙකුත් ආයතනවල සිසුන් සඳහා ප්‍රායෝගික හා සේවාස්ථ පුහුණුව ලබාදීමටද මෙම මධ්‍යස්ථානය කටයුතු කර ඇත. එමඟින් තරුණ තරුණියන්ට නවීන තාක්ෂණය පිළිබඳ දැනුම මෙන්ම සැබෑ සේවා පරිසරයක අත්දැකීම් ලබාගැනීමටද අවස්ථාව හිමි වේ.
පුහුණුවේ ප්‍රතිලාභ පාරිභෝගිකයා වෙත
TVS Knowledge Center හි ප්‍රධාන අරමුණ වන්නේ දෝෂ නිවැරදිව හඳුනාගෙන විසඳීමට සමත් කාර්මික ශිල්පීන්, නිෂ්පාදන පිළිබඳ මනා දැනුමක් ඇති අලෙවි නිලධාරීන් සහ උසස් පාරිභෝගික සේවාවක් සපයන කණ්ඩායම් බිහි කිරීමයි. එමඟින් TVS පාරිභෝගිකයන්ට වඩාත් විශ්වාසදායක හා තෘප්තිමත් සේවා අත්දැකීමක් ලබාදීමට අපේක්ෂා කෙරේ.
රාගම පුහුණු මධ්‍යස්ථානය විවෘත කිරීමත් සමඟ සිය පුහුණු ධාරිතාව තවදුරටත් ඉහළ නැංවීමට TVS Knowledge Center සැලසුම් කර ඇත. මසකට පුහුණු වැඩසටහන් 20කට වැඩි සංඛ්‍යාවක් පැවැත්වීම සහ තාක්ෂණික හා අලෙවි ක්ෂේත්‍රවල පුහුණුලාභීන් 450කට වැඩි පිරිසකට මාසිකව පුහුණුව ලබාදීම එහි ඉලක්කයයි. සමාගමේ සේවකයන්, බලයලත් අලෙවි හා සේවා නියෝජිතයන්, පෞද්ගලික ගරාජ් කාර්මික ශිල්පීන් සහ කර්මාන්තයට පිවිසීමට අපේක්ෂා කරන අනාගත කාර්මික ශිල්පීන්ට මෙම වැඩසටහන් මඟින් ප්‍රතිලාභ සැලසෙනු ඇත.
වාහන තාක්ෂණය නිරන්තරයෙන් දියුණු වීමත් සමඟ නව පද්ධති පිළිබඳ දැනුම, දෝෂ හඳුනාගැනීමේ හැකියාව සහ පාරිභෝගික සේවා කුසලතා ඇති වෘත්තිකයන්ගේ අවශ්‍යතාවද ඉහළ යමින් පවතී. වර්තමාන අවශ්‍යතා සපුරාලීමට මෙන්ම අනාගත තාක්ෂණික වෙනස්කම්වලටද සූදානම් මානව සම්පතක් ගොඩනැගීම TVS Knowledge Center හි අරමුණයි.
මෙම අවස්ථාවට සහභාගී වූ TVS ලංකා පුද්ගලික සමාගමේ ප්‍රධාන විධායක නිලධාරී ගීතාල් ඇන්තනී මහතා සඳහන් කළේ, යතුරුපැදි හා ත්‍රීරෝද රථ කර්මාන්තයේ නියුතු සේවක මහත්ම මහත්මීන්ගේ දැනුම හා වෘත්තීය නිපුණතා වර්ධනය කරමින්, සමාගමට සම්බන්ධ සියලු අලෙවි, සේවා සහ අමතර කොටස් නියෝජිත ආයතන තුළ උසස් පාරිභෝගික සේවාවක් තහවුරු කිරීම මෙම පුහුණු මධ්‍යස්ථාන ආරම්භ කිරීමේ මූලික අරමුණ බවයි.
එසේම, TVS ලංකා පුද්ගලික සමාගමේ පුහුණු කටයුතු භාර මානව සම්පත් හා පරිපාලන අංශයේ නියෝජ්‍ය සාමාන්‍යාධිකාරී ලසන්ත ගුණවර්ධන මහතා සඳහන් කළේ, සමාගමේ මෙන්ම ඊට සම්බන්ධ සියලු ආයතනවල ප්‍රගතිය සඳහා ඒවායේ සේවය කරන පිරිසගේ දැනුම හා කුසලතා සංවර්ධනය කිරීම අත්‍යවශ්‍ය බවයි. එම අරමුණ සාක්ෂාත් කරගැනීම සඳහා මෙම පුහුණු මධ්‍යස්ථානය සුවිශේෂී දායකත්වයක් ලබාදෙනු ඇති බවද ඒ මහතා වැඩිදුරටත් ප්‍රකාශ කළේය.
2024 වසරේ කොළඹ 14 ප්‍රදේශයෙන් ආරම්භ වූ TVS Knowledge Center හි ගමන, රාගම දෙවැනි පුහුණු මධ්‍යස්ථානය විවෘත කිරීමත් සමඟ තවත් ඉදිරියට ගෙන යමින් තිබේ. වෘත්තීය දැනුම, ප්‍රායෝගික කුසලතා සහ උසස් සේවාවක් සැපයීමේ කැපවීම ඇති වෘත්තිකයන් බිහි කරමින්, පාරිභෝගික විශ්වාසය හා තෘප්තිය ඉහළ නැංවීමටත්, ශ්‍රී ලංකාවේ යතුරුපැදි හා ත්‍රීරෝද රථ කර්මාන්තයේ දියුණුවට දායක වීමටත් TVS Knowledge Center අපේක්ෂා කරයි.
