කොළඹ, ශ්රී ලංකාව – මෙරට වේගයෙන්ම විකාශනය වන තාක්ෂණික පද්ධතිය සමඟ වඩාත් සමීපව කටයුතු කිරීමේ සහ බැංකුවේ ඩිජිටල් හැකියාවන් වර්ධනය කිරීමේ අරමුණින්, 2026 වසර සඳහා ශ්රී ලංකා තොරතුරු තාක්ෂණ කර්මාන්ත සම්මේලනයේ (FITIS) පූර්ණ සාමාජිකත්වය දිනා ගැනීමට DFCC බැංකුව සමත් වී තිබේ.
ශ්රී ලංකාවේ තොරතුරු හා සන්නිවේදන තාක්ෂණ ක්ෂේත්රයේ ප්රමුඛතම ආයතනය වන FITIS, තාක්ෂණික සේවා සපයන්නන්, නියාමකයින් සහ ක්ෂේත්රයේ පාර්ශවකරුවන් එක් කරමින් මෙරට ඩිජිටල් සංවර්ධනයේ දිශානතිය තීරණය කිරීමෙහිලා සුවිශේෂී කාර්යභාරයක් ඉටු කරයි. ගනුදෙනුකරුවන්ගේ අපේක්ෂාවන් සපුරාලීමට සහ බැංකු මෙහෙයුම් සරල කිරීමට ඩිජිටල් තාක්ෂණය අත්යවශ්ය සාධකයක් වී ඇති වර්තමානයක, මෙම තාක්ෂණික පද්ධතිය සමඟ සක්රීයව සම්බන්ධ වීමට DFCC බැංකුව ගත් මෙම තීරණය ඉතා වැදගත් පියවරකි.
DFCC බැංකුව සඳහා ඩිජිටල් පරිවර්තනය යනු හුදෙක් එක් ව්යාපෘතියක් පමණක් නොව, එය බැංකුවේ සමස්ත මෙහෙයුම් ක්රියාවලිය තුළටම මුහු කළ අංගයකි. සේවාවන් ලබාගැනීමේ සිට ගනුදෙනු සැකසීම සහ තීරණ ගැනීම දක්වා වූ සියලු අංශයන් මෙමගින් ආවරණය වේ. බැංකුවේ මූලික ඉලක්කය වන්නේ සේවා සැපයීමේදී ඇති වන බාධා අවම කරමින්, වඩාත් කාර්යක්ෂම සහ ගනුදෙනුකාර-කේන්ද්රීය බැංකු අත්දැකීමක් ලබා දීමයි.
FITIS සමඟ එක්වීම හරහා නැගී එන තාක්ෂණයන්, ක්ෂේත්රයේ නවතම තොරතුරු සහ සහයෝගීතා වේදිකාවන් වෙත පිවිසීමට DFCC බැංකුවට අවස්ථාව ලැබේ. එමගින් සේවා සැපයීමට ගතවන කාලය අවම කිරීමටත්, වඩාත් සරල මෙන්ම ගනුදෙනුකරුවන්ට පහසුවෙන් හැසිරවිය හැකි සේවාවන් සැපයීමටත් බැංකුව අපේක්ෂා කරයි.
ඩිජිටල් සේවාවන් ප්රවර්ධනය කිරීම, නවෝත්පාදනය දිරිමත් කිරීම සහ ක්ෂේත්රයේ කුසලතා සංවර්ධනය කිරීම සඳහා FITIS ආයතනයේ ‘ඩිජිටල් පරිච්ඡේදය‘ ප්රමුඛ මෙහෙවරක් ඉටු කරයි. DFCC බැංකුවේ මෙම සහභාගීත්වය හරහා බැංකු සේවක මණ්ඩලයේ ඩිජිටල් කුසලතා ඔපමට්ටම් කිරීමටත්, අනාගත තාක්ෂණික අභියෝගයන්ට සාර්ථකව මුහුණ දීමට හැකි දක්ෂතා සපිරි පද්ධතියක් ගොඩනැගීමටත් හැකි වනු ඇත.
තාක්ෂණික දියුණුව හුදෙක් මෙවලම්වලට පමණක් සීමා නොවී, එය ආයතනික සංස්කෘතිය සහ ක්රියාවලීන් සමඟ මනාව ඒකාබද්ධ කිරීම සාර්ථකත්වයේ රහසයි. FITIS වැනි ප්රමුඛ ආයතන සමඟ අත්වැල් බැඳගනිමින්, නවීන ගනුදෙනුකාර අවශ්යතාවලට ගැළපෙන, වඩාත් සරල සහ ප්රතිචාරාත්මක බැංකු සේවාවක් ලබා දීමට DFCC බැංකුව නිරන්තරයෙන් කැපවී සිටියි.
DFCC බැංකුව පිළිබඳව
ශ්රී ලංකාවේ ප්රමුඛතම මූල්ය ආයතනයක් වන DFCC බැංකුව 1955 වසරේදී ස්ථාපිත කරන ලද අතර, 1956 වසරේ සිටම එය කොළඹ කොටස් හුවමාරුවේ ලියාපදිංචි වී සිටී. ශ්රී ලංකා මහ බැංකුව විසින් නියාමනය කරනු ලබන එය Fitch Ratings වෙතින් A (lka) ශ්රේණිය හිමි කරගෙන තිබේ. DFCC බැංකුව විසින් පාරිභෝගික, ආයතනික හා සුළු හා මධ්යම පරිමාණ බැංකු සේවාවන් මෙන්ම භාණ්ඩාගාර, ආයෝජන සහ වෙළඳ මූල්ය සේවා ඇතුළු සේවාවන් රාශියක් පිරිනමනු ලබයි.
පාරිභෝගික කේන්ද්රීයත්වය හා තිරසාරත්වය උදෙසා මුල් තැන දෙන DFCC බැංකුව DFCC MySpace වැනි ඩිජිටල් සේවාවන් ඇතුළු ක්රම රාශියක් ඔස්සේ කාර්යක්ෂම හා සුරක්ෂිත ලෙස සිය සේවාවන් පිරිනමන අතර, දිවයින පුරා ශාඛා 133 ක්ද පිහිටුවා ඇත. මීට අමතර එම බැංකුවේ ගනුදෙනුකරුවන්ට LankaPay ජාලය හරහා ATM යන්ත්ර 5,500 කට අධික සංඛ්යාවක් භාවිතා කළ හැකි වේ.
තිරසාර මූල්යකරණය සහ පුනර්ජනනීය බලශක්තිය සම්බන්ධ පිළිගත් ප්රමුඛයෙකු වන DFCC බැංකුව, පාරිසරික බලපෑම් අවම කරමින් ආර්ථිකයේ දීර්ඝකාලීන ඔරොත්තු දීමේ හැකියාව වර්ධනය කිරීම සඳහා කැප වී සිටී.
