HNB ජෙනරල් ඉන්ෂුවරන්ස් (HNBGI) සමාගම සිය නව ප්රධාන මෙහෙයුම් නිලධාරී තනතුර (COO) සඳහා ඩිල්ෂාන් පෙරේරා මහතා පත් කළ බව නිවේදනය කර සිටියි. ඩිල්ෂාන් පෙරේරා මහතා මෙම පත්වීමට පෙර HNB ජෙනරල් ඉන්ෂුවරන්ස් සමාගමේ ප්රධාන පරිවර්තන නිලධාරී (Chief Transformation Officer) තනතුර දැරූ අතර, නව තාක්ෂණය සහ පාරිභෝගික කේන්ද්රීය උපාය මාර්ගවල එකතුව හරහා සමාගම අනාගතයට සූදානම් රක්ෂණ ආයතනයක් බවට පරිවර්තනය කිරීමට සුවිශේෂී කාර්යභාරයක් ඉටုකර ඇත. HNB ජෙනරල් ඉන්ෂුවරන්ස් සමාගම විසින් කළ මෙම පත්වීම ක්ෂේත්රයට අදාළව සිය උපායමාර්ගික පරිවර්තනය ඉදිරියට ගෙන යාම සඳහා සමාගම දක්වන කැපවීම තවදුරටත් තහවුරු කරන්නකි.
ජ්යෙෂ්ඨ කළමනාකරණ නිලධාරියෙක් වශයෙන් වසර 20 කට වඩා වැඩි අත්දැකීම් ඇති ඩිල්ෂාන් පෙරේරා මහතා ජීවිත රක්ෂණ, සාමාන්ය රක්ෂණ, විදුලි සංදේශ, පාරිභෝගික බැංකුකරණය වැනි විවිධ ක්ෂේත්රයන්හි නායකත්ව තනතුරු දරා ඇත. එම කාලය පුරාවටම උපායමාර්ගික කළමනාකරණය, ඩිජිටල් පරිවර්තනය, අලෙවිකරණය සහ සන්නාම කළමනාකරණය, විකුණුම් කළමනාකරණය, ව්යාපාර සංවර්ධනය, පාරිභෝගික අත්දැකීම් කළමනාකරණය වැනි විවිධ අංශයන්හි සේවය කරමින් ලැබූ පරිපූර්ණ අත්දැකීම් සම්භාරයක් ඔහු සතුය.
ඩිල්ෂාන් පෙරේරා මහතා HNB ජෙනරල් ඉන්ෂුවරන්ස් සමාගම හා සම්බන්ධ වීමට පෙර ඩයලොග් ආසියාටා (Dialog Axiata PLC) සමාගමේ ඩිජිටල් රක්ෂණ සේවා ප්රධානී (Head of InsurTech) ලෙස කටයුතු කළ අතර, HNB ඇෂුවරන්ස් සමාගමේ අලෙවි ප්රධානී (Head of Marketing) ලෙස ද කටයුතු කර ඇත. මීට අමතරව DFCC බැංකුව සහ සෙලින්කෝ ලයිෆ් යන ආයතනවල ද කළමනාකාරීත්ව තනතුරු හොබවා ඇති ඒ මහතා සෙසු රටවල් හා සසඳන කල ශ්රී ලංකාවේ ප්රථම රක්ෂණ ප්රතිපත්ති සැසඳුම් වේදිකාව වන InsureMe.lk හි සම-නිර්මාතෘවරයෙක් වේ.
මෙම නව පත්වීම පිළිබඳව අදහස් දක්වමින් HNB ජෙනරල් ඉන්ෂුවරන්ස් සමාගමේ විධායක අධ්යක්ෂ / ප්රධාන විධායක නිලධාරී සිතුමිණ ජයසුන්දර මහතා මෙසේ පැවසීය, “ඩිල්ෂාන් ප්රධාන මෙහෙයුම් නිලධාරී තනතුරට පැමිණෙන්නේ උපායමාර්ගික, ඩිජිටල් සහ මෙහෙයුම් වැනි අංශයන්හි වසර ගණනාවක් පුරා ලබා ඇති නායකත්ව අත්දැකීම් රැසක් සමඟයි. ඔහුගේ වෘත්තීය ඉතිහාසය තුළ නවෝත්පාදනය, සන්නාම ප්රවර්ධනය සහ කාර්යසාධනය අතින් කැපී පෙනෙන ජයග්රහණ රැසක් ඔහු ලබා තිබෙනවා. HNB ජෙනරල් ඉන්ෂුවරස් සමාගමේ ඉදිරි දැක්ම අඛණ්ඩ පරිවර්තනය හරහා අඛණ්ඩ වර්ධනයක් අත්පත් කරගැනීමයි. සමාගමේ නව ප්රධාන මෙහෙයුම් නිලධාරීවරයා වශයෙන් සමාගමේ ඉදිරි ගමනට ඔහුගෙන් ලැබෙන දායකත්වය අපට ඉතාමත් වැදගත්.”
ඩිල්ෂාන් පෙරේරා මහතා එක්සත් රාජධානියේ වරලත් අලෙවිකරණ ආයතනයේ සාමාජිකයෙකු (FCIM – UK) වන අතර, ශ්රී ලංකා අලෙවිකරණ ආයතනයේ (SLIM) යාවජීව සාමාජිකයෙකු ද, ශ්රී ලංකා කළමනාකරණ ආයතනයේ සාමාජිකයෙකු ද වෙයි. ඔහු ශ්රී ජයවර්ධනපුර විශ්ව විද්යාලයේ පශ්චාත් උපාධි කළමනාකරණ ආයතනයෙන් (PIM) ව්යාපාර පරිපාලන පශ්චාත් උපාධියක් (MBA) ලබා ඇති අතර, කැලණිය විශ්ව විද්යාලයෙන් ව්යාපාර කළමනාකරණ (අලෙවිකරණ) විශේෂ උපාධියක් සහ එක්සත් රාජධානියේ CIM ආයතනයෙන් අලෙවිකරණය පිළිබඳ වෘත්තීය පශ්චාත් උපාධි ඩිප්ලෝමාවක් ද ලබා ඇත. එමෙන්ම ඔහු ඇමරිකාවේ LIMRA International ආයතනය හරහා පවත්වන ‘Agency Management Training Course (AMTC)‘ පාඨමාලාව ද හදාරා ඇත. කඳාන ද මැසනොද් විද්යාලයේ ආදි ශිෂ්යයෙකු වන පෙරේරා මහතා, ශ්රී ලංකාවේ ප්රමුඛ පෙළේ උසස් අධ්යාපන ආයතන කිහිපයක බාහිර කථිකාචාර්යවරයෙකු ලෙස ද කටයුතු කරයි.
ශ්රී ලංකා රක්ෂණ නියාමන කොමිෂන් සභාවේ (IRCSL) බලපත්ර ලත් රක්ෂණ සමාගමක් වන HNB ජෙනරල් ඉන්ෂුවරන්ස් සමාගම දිවයින පුරා විහිදුණු කාර්යක්ෂම ශාඛා ජාලයක් හරහා මෝටර් / මෝටර් නොවන අංශයන්ට අයත් පුළුල් පරාසයක රක්ෂණ සේවාවන් පාරිභෝගිකයින්ට සපයයි. නවෝත්පාදනය, ඩිජිටල්කරණය සහ පාරිභෝගික සේවා විශිෂ්ටත්වය හේතුවෙන් ක්ෂේත්රයේ සාමාන්ය වර්ධන වේගය අභිබවා ගිය වර්ධනයක් අඛණ්ඩව වාර්තා කර ඇති HNB ජෙනරල් ඉන්ෂුවරන්ස් සමාගම ශ්රී ලංකාවේ හොඳම සාමාන්ය බැංකු රක්ෂණ සමාගම ලෙස අවස්ථා ගණනාවකදීම ජාත්යන්තර ඇගයීම් ලබා ඇති සමාගමකි.
සිය මූල්ය ස්ථාවරත්වය වෙනුවෙන් ෆිච් රේටින්ග්ස් (Fitch Ratings) වෙතින් ලබා ඇති ‘A(lka)‘ ශ්රේණිගත කිරීම ලබා ඇති HNB ජෙනරල් ඉන්ෂුවරන්ස් සමාගම ශ්රී ලංකාවේ ප්රමුඛතම මූල්ය හා බැංකු සමූහයක් වන HNB සමූහයේ සාමාජිකයෙකු සහ HNB Life PLC සමාගමේ අනුබද්ධිත සමාගමක් වේ.
