Uber Eats අඛණ්ඩ සේවා ව්‍යාප්තිය හරහා ශ්‍රී ලංකාවේ තවත් ප්‍රජාවන් රැසක් වෙත සමීප කිරීමට පියවර.
Uber Eats මෙරට ජනතාව වෙත සිය සේවා ජාලය තවදුරටත් ව්‍යාප්ත කරමින්, සිය ආහාර බෙදාහැරීමේ සේවාව බදුල්ල, බණ්ඩාරවෙල සහ ඇල්ල යන ප්‍රදේශ වෙත සාර්ථකව හඳුන්වා දී ඇත. ප්‍රසිද්ධ තේ වගා කලාපයක් මෙන්ම ආරුක්කු නවය පාලම වැනි ලෝක ප්‍රකට සංචාරක ආකර්ෂණීය ස්ථානවලින් සමන්විත මෙම මධ්‍යම කඳුකර කලාපයට, පහසු සහ කාර්යක්ෂම ආහාර බෙදාහැරීමේ අත්දැකීමක් ලබාදීම මෙම ව්‍යාප්තියේ අරමුණයි. මේ අනුව, ප්‍රණීත බත් සහ කරි වේලක සිට කෙටි ආහාර හෝ උදෑසන කෝපි කෝප්පයක් දක්වා තමන් කැමති ඕනෑම ආහාරයක් තම නිවසටම ගෙන්වා ගැනීමේ පහසුකම ප්‍රදේශවාසීන්ට මෙන්ම සංචාරකයින්ටද දැන් අවස්ථාව හිමි වේ. නුවරඑළිය සහ රත්නපුර දිස්ත්‍රික්කවලින් අනතුරුව, Uber Eats මෙරට තුළ සිය සේවාවන් ව්‍යාප්ත කළ තෙවන දිස්ත්‍රික්කය ලෙස බදුල්ල සටහන් වේ.
Uber Eats සේවාව හඳුන්වාදීමත් සමඟ, ප්‍රදේශයේ ජනප්‍රිය ආපනශාලා මෙන්ම දේශීය ආහාර අලෙවිසැල් රැසකින් තමන් කැමති ආහාර වර්ග පහසුවෙන් සොයාගෙන ඇණවුම් කිරීමට පාරිභෝගිකයින්ට අවස්ථාව හිමි වේ. මෙරට ප්‍රධාන සංචාරක ස්ථානයක් වන ඇල්ල ප්‍රදේශයට පැමිණෙන දෙස් විදෙස් සංචාරකයින්ගේ ආහාර තේරීම් සහ පහසුව වැඩිදියුණු කිරීම මෙම ව්‍යාප්තියේ ප්‍රධාන අරමුණකි. එමෙන්ම, ප්‍රදේශයේ ආපනශාලා සහ භෝජනාගාර වෙත නව පාරිභෝගික පිරිසක් වෙත පහසුවෙන් ළඟා වීමට අවස්ථාව සලසා දීම හරහා, දේශීය ව්‍යාපාරිකයින්ගේ වර්ධනයට සහාය වීමටද Uber Eats දායක වේ.
Uber Eats ඩිජිටල් තාක්ෂණික වේදිකාව හරහා දේශීය ව්‍යාපාරිකයන්ට සහ වෙළෙඳුන්ට වැඩි පාරිභෝගික පිරිසක් වෙත ළඟා වීමට අවස්ථාව සැලසෙන අතර, ආහාර බෙදාහැරීමේ හවුල්කරුවන් සඳහා නම්‍යශීලී අතිරේක ආදායම් අවස්ථාද නිර්මාණය වේ. විශේෂයෙන්ම, බදුල්ලේ වේගයෙන් වර්ධනය වන සංචාරක ආර්ථිකයට දායක වන දේශීය ව්‍යාපාර සඳහා, අන්තර්ජාලය හරහා ආහාර ඇණවුම් කිරීමේ (Online Food Delivery) ඉහළ යන ඉල්ලුමට ප්‍රතිචාර දැක්වීමටත්, සිය ව්‍යාපාරික කටයුතු තවදුරටත් පුළුල් කර ගැනීමටත් මෙමඟින් නව අවස්ථා රැසක් විවර වේ.
මේ පිළිබඳව අදහස් දක්වමින් Uber ශ්‍රී ලංකා හි බෙදාහැරීම් අංශයේ ශ්‍රී ලංකා මෙහෙයුම් භාර කළමනාකරු වරුණ විජේවර්ධන මහතා මෙසේ පැවසීය. “ශ්‍රී ලංකාව පුරා අපගේ සේවාවන් ව්‍යාප්ත කිරීමේ මූලික අරමුණ වන්නේ, තාක්ෂණය මඟින් උදා වන පහසුව සහ නව ව්‍යාපාරික අවස්ථා ප්‍රධාන නගරවලට පමණක් සීමා නොකර, දිවයින පුරා විවිධ ප්‍රජාවන් වෙත සමීප කිරීමයි. බදුල්ල දිස්ත්‍රික්කය වෙත අපගේ සේවාවන් ව්‍යාප්ත කරන මෙම අවස්ථාවේදී, ප්‍රදේශයේ ආපනශාලා, වෙළෙඳුන් සහ බෙදාහැරීමේ හවුල්කරුවන් සමඟ එක්ව කටයුතු කරමින්, එම ප්‍රජාවේ එදිනෙදා ජීවිතයේ විශ්වාසනීය කොටස්කරුවෙකු බවට පත්වීමට අප බලාපොරොත්තු වෙනවා.”
දිවයින පුරා සිය ව්‍යාපාරික කටයුතු තවදුරටත් පුළුල් කරමින්, වැඩි ප්‍රජාවන් වෙත සේවාවන් සමීප කිරීමටත්, දේශීය වෙළෙඳුන් සහ බෙදාහැරීමේ හවුල්කරුවන් සඳහා නව අවස්ථා නිර්මාණය කිරීමත් සඳහා Uber Eats අඛණ්ඩව කටයුතු කරයි.
