ශ්රී ලාංකික අප ගෙදරදොරේදී, රැකියා ස්ථානයේදී, මිතුරු හමුවලදී නිතර කතාබහට ලක්නොවෙන මාතෘකා කිහිපයකි. මාසික වැටුප්, පාසල් ගාස්තු, මීළඟට මිලදීගැනීමට බලාපොරොත්තුවන වාහනයේ මිලගණන් ආදිය ඒ අතර විය හැකි වුව ද, එපමණකටවත් කතාබහට ලක්නොවන මාතෘකාවක් වන්නේ, අපේ රැකියා ජීවිතය අවසන් වූ පසු, මාසික වේතනය නොලැබෙන විට අපි කුමක් කරන්නේ ද යන්නයි.
වයස අවුරුදු තිහ හතළිහ සීමාවේ පසුවන බොහෝ වෘත්තීකයින්ගේ අතමිට යහමින් තිබේ. ඔවුහු ඒ වෙනුවෙන් වෙහෙස වී වැඩකරති. නිවාස ණය, පාසල් ගාස්තු ගෙවාගෙන යන අතරතුර වරින් වර නිවාඩුවකට සංචාරය කරන අතර, සුළු ආයෝජන අරමුදලක් ද පවත්වාගන යාමට කටයුතු කරති. සේවක අර්ථ සාධක අරමුදල ගැන ද ඔවුහු සිහියේ තබාගෙන සිටිති. යම් බැංකු ඉතුරුම් ප්රමාණයක් ද ඇතුවාට සැක නැත. එහෙත් ඔවුන් සිදුකරන බරපතලම අත්වැරැද්ද වන්නේ තමන් විශ්රාම යනවිට සේවක අර්ථසාධක අරමුදලේ ශේෂය තම සම්පූර්ණ විශ්රාම ජීවිතයම ආවරණය කිරීමට සමත්වනු ඇත්දැයි නොදැන සිටීමයි.
ශ්රී ලාංකික ජීවිත රක්ෂණ ක්ෂේත්රයේ ප්රමුඛයා ලෙස සෙලින්කෝ ලයිෆ් ජීවිත රක්ෂණ සමාගම දශක තුනක් මුළුල්ලේ මෙම කටුක යථාර්ථය නිරීක්ෂණය කර තිබේ. එමෙන්ම එය කිසිසේත්ම නොසළකා හැරිය නොයුතු කරුණක් බව ද සෙලින්කෝ ලයිෆ්හි විශ්වාසයයි.
මෙය හුදෙක් නොසළකා හැරීමක් ලෙස සිතීම ද නිවැරදි නොවේ. වයස අවුරුදු හතළිහේ පසුවන කෙනෙකුගේ විශ්රාම දිවිය එළඹෙන්නේ තවත් අවුරුදු විස්සක පමණ කාලයකට පසු ය. එවැනි කාලසීමාවක් ඉදිරියේ තිබියදී විශ්රාම සැලසුමක් පිළිබඳ උනන්දුවන්නේ අතළොස්සකි. නමුත් මෙහි බරපතලකම වන්නේ විශ්රාම ගැනීමට ආසන්න කාලයේදී මෙම උනන්දුව ඇතිවීමෙන් ඵලක් නොවීමයි. එනම්, සාර්ථක සුවදායී විශ්රාම ජීවිතයක් ගතකිරීමට සැලසුම් කළ යුතුව තිබූ කාලය, ඒ වනවිට ඉක්ම ගොස් ඇති බැවිනි.
සේවක අර්ථසාධක අරමුදල පිළිබඳ ඇති මායාව
සේවක අර්ථසාධක අරමුදලේ ප්රතිලාභ ලෙස අපි මඳකට හැරී බලමු. 2024 වසරේ සේවක අර්ථ සාධක අරමුදලේ
වාර්ෂික වාර්තාවට අනුව එම වසර තුළ අරමුදලේ සාමාජිකයින්ට ගෙවූ මුළු ප්රතිලාභවල වටිනාකම රුපියල් බිලියන 230කි. ඊට විශ්රාම ප්රතිලාභ මෙන්ම, නිවාස අවශ්යතා හෝ වෛද්ය ප්රතිකාර අවශ්යතා ආදී සේවක අර්ථසාධක අරමුදල් පනත යටතේ ප්රතිපාදන සලසා ඇති අවශ්යතා වෙනුවෙන් කල්තබා අරමුදලේ මුදල් ලබාගැනීමේ හැකියාව යටතේ ලබාගත් ප්රතිලාභ ද අයත් වේ.
ඒ අනුව සේවක අර්ථ සාධක අරමුදලින් බැහැරවන සාමාජිකයින් සංඛ්යාව ඉහළයන විට විශ්රාම යනවිට හිමිවන සේවක අර්ථසාධක අරමුදල් ප්රතිලාභවල අගය ද අඩුවනු ඇත. වසර 15ක් සහ ඉන් එහාට වූ විශ්රාම ජීවිතයක් ගතකිරීමේදී හිමිවන මාසික මුදල ඉතා අඩු අගයක් ගැනීම වැළැක්විය නොහැක.
මෙරට පෞද්ගලික අංශයේ නිල විශ්රාම වයස වන්නේ වයස අවුරුදු 60 ය. වර්තමානය වනවිට ශ්රී ලංකාවේ සාමාන්ය ආයු අපේක්ෂාව වසර 77-78ක් අතර අගයක් ගනී. ඒ අනුව සාමාන්ය වයසේදී විශ්රාම යන පුද්ගලයෙකු අවම තරමින් තවත් වසර 15ක් හා ඉන් ඔබ්බට වූ තම ජීවිත කාලය සුවපහසු ලෙස ගෙවීමට සේවක අර්ථ සාධක අරමුදලින් හිමිවන කුඩා මුදල කිසිසේත්ම ප්රමාණවත් නොවේ.
අපි උදාහරණ කිහිපයක් දෙස බලමු. අද වනවිට හාල් කිලෝවක මිල, මීට අවුරුදු දහයකට පෙර සම්පූර්ණ කෑමවේලක මිලට ද වඩා ඉහළ ගොස් තිබේ. මීට අවුරුදු දහයකට පෙර පෞද්ගලික රෝහලක වෛද්යවරයෙකු ලවා පරීක්ෂාකිරීම වැය වූයේ රුපියල් 2,000ක් පමණ ගාස්තුවකි. දැන් එම ගාස්තුව රුපියල් 4,000කි. බහුලව දක්නට ලැබෙන නිදන්ගත රෝග ප්රතිකාර සඳහා ලබාගන්නා මාසික ඖෂධවල මිල රුපියල් 10,000 ඉක්මවා තිබේ. මෙවන් පසුබිමක සේවක අර්ථසාධක අරමුදල සුවපහසු විශ්රාම ජීවිතයක් පිරිනමන්නේ නැති බව පැහැදිලිය.
උද්ධමන වේගය ද මීට එකතුවූ විට තත්ත්වය තවත් නරක අතට හැරේ. ශ්රී ලංකාවේ උද්ධමන අනුපාතයේ අතීතය දෙස බැලීමේදී ශ්රී ලාංකිකයින්ගේ ක්ෂය ශක්තිය (මිලදී ගැනීමේ හැකියාව) කෙතරම් දුරට හැකිළී ඇත්දැයි හොඳින් පෙනීයයි. විශ්රාම වයසේදී ප්රමාණවත් වනු ඇතැයි අනුමාන කරන මුදලක සැබෑ වටිනාකමෙන් විශාල පංගුවක් ඉදිරි අවුරුදු දහයක කාලය තුළ අහිමිවී යාමට ඉඩ තිබේ. උද්ධමන වේගය ගැන ශ්රී ලාංකික අප සතු අත්දැකීම එබඳුය.
මේ අනුව අවුරුදු පහළොවක් හෝ ඉන් ඔබ්බට වූ විශ්රාම ජීවිතයක් ගෙවීමට සේවක අර්ථසාධක අරමුදලෙන් හිමිවන කුඩා මුදල ප්රමාණවත් නොවන බව සහතික ය.
″සේවක අර්ථසාධක අරමුදල ගොඩනඟාතිබෙන්නේ පරිපූර්ණ විශ්රාම සැලසුමක් ලෙස නොවෙයි. එය හුදෙක් විශ්රාම ජීවිතයට පදනමක් පමණයි. එය වැදගත් අරමුදලක් බව සත්ය නමුත් ඒ මත තමන්ගේ විශ්රාම ජීවිතය රඳාපවත්වා ගැනීම ඉතාම වේදනාබර අත්දැකීමක් වනු අනිවාර්යයි″, යනුවෙන් සෙලින්කෝ ලයිෆ් සමාගමේ අධ්යක්ෂ සහ නියෝජ්ය ප්රධාන විධායක නිලධාරී රංග අබේනායක මහතා පවසයි.
වැඩිම අවදානම ඇත්තේ කාටද?
විශ්රාම ජීවිතයේ අවදානම ඇත්තේ පහළ ආදායම්ලාභීන්ට පමණක් යැයි සැළකීම සම්පූර්ණයෙන්ම වැරදිය. වෘත්තීය ප්රජාව අයත්වන මධ්යම සහ ඉහළ මධ්යම පන්තිය විශ්රාම ජීවිතය ගතකිරීමේදී ඔවුන්ටම ආව්ණික වූ අවදානමකට ලක්ව සිටී. එය ඇතැම්විට ඔවුන්ට ද නොදැනී ඇතිවන අවදානමකි.
මෙම අවදානමේ පදනම වන්නේ වෘත්තීකයින් ඉහළ ජීවන වියදමක් නඩත්තු කරගෙන යාමට හුරුව සිටීමයි. ඔවුන් ජීවත්වන නිවස මිලාධික ය. ඔවුන්ගේ දරුවන් ඉගෙනගන්නේ ඉහළ පෙළේ පාසල්වල ය. ඔවුහු නිතරම අවන්හල්වලින් ආහාර ගනිති. නිවාඩුවට සංචාරය කරති. සෞඛ්ය සේවා සඳහා වියදම් කරති. එනිසා විශ්රාම වයසට පැමිණීමේදී ඔවුන්ගේ මාසික වියදම් සඳහා වැයවන මුදල රුපියල් 50,000ක් නොව රුපියල් ලක්ෂ 2 ද ඉක්මවා යා හැක.
කෙසේ නමුත් විශ්රාමිකයින්ගේ ඉතුරුම් ප්රමාණය එම ආදායමට සමාන වන්නේ කලාතුරකිනි. සේවක අර්ථසාධක අරමුදලේ ප්රතිලාභ වැටුප්තල අනුව වෙනස්වන අතර, විටින් විට තම සේවා ස්ථානය මාරු කළ වෘත්තිකයින්ගේ සේවක අර්ථසාධක අරමුදලේ යම් අඩුලුහුඬුතා ද පැවැතිය හැක. මේ අතර ව්යාපාර හිමිකරුවන්ට සහ ස්වයංරැකියා නියුක්තිකයින්ට සේවක අර්ථසාධක අරමුදලෙන් කිසිදු ආවරණයක් හිමි නොවේ. මෙවන් පසුබිමක, තමන්ට සැබවින්ම විශාම ජීවිතයට අවශ්ය මුදල, උද්ධමන වේගය, සෞඛ්ය වියදම් පමණක් නොව යම් හෙයකින් තම සහකරු හෝ සහකාරිය තමන්ට වඩා වැඩි ආයුකාලයක් භුක්ති විඳින පසුබිමක ඔහුට හෝ ඇයට රැකවරණ සැලසීම ආදී සියලු කාරණා සැළකිල්ලට ගෙන විශ්රාම ජීවිතය සැලසුම්කර ඇත්තේ අතළොස්සක් දෙනෙකි.
″වෘත්තීකයින් ලෙස අපි සියලු දෙනා උත්සාහ කරන්නේ වර්තමානය ආර්ථික වශයෙන් ශක්තිමත් කරගැනීමටයි. හොඳ වැටුප්, සැළකිය යුතු වත්කම් ආදිය වෘත්තීකයින් සතුයි. ඒ වගේම යම් දිනක විශ්රාම ජීවිතය හොඳින් සැලසුම් කරගැනීමටත් ඔවුන් ලෑස්තියි. නමුත් එය අනාගතයේ කළ යුතු දෙයක් මිස වර්තමානයේ කළ යුතු දෙයක් ලෙස නොදැකීම ඔවුන් සිදුකරන බරපතලම වැරැද්දයි″, අබේනායක මහතා වැඩිදුරටත් සඳහන් කරයි.
පරම්පරා දෙකකට මැදි වු පරම්පරාව
වයස අවුරුදු හතළිහ සහ පනහ අතර පසුවන වෘත්තීකයින් (the sandwich generation) මුහුණ දෙන තවත් ගැටලුවක් තිබේ. එනම්, ඔවුන්ට තම දරුවන්ගේ අධ්යාපනයට මුදල් වැය කරන අතරතුරදීම තම වයස්ගත දෙමාපියන්ගේ රැකවරණයට ද මුදල් යෙදීමට සිදුවීමයි. එනිසාම තම විශ්රාම දිවිය සැලසුම් කිරීම ඔවුන්ගේ ප්රමුඛතා ලැයිස්තුවේ අගටම තල්ලුවීම ස්වභාවික ය.
ශ්රී ලංකාවේ අනාගත ජනගහන සංයුතිය අනුව ද මෙම තත්ත්වය තවත් නරක අතට හැරේ. එනම් වර්ෂ 2042 වනවිට සෑම ශ්රී ලාංකිකයින් සිව්දෙනෙකුගෙන්ම එක් අයෙක් වයස්ගත පුද්ගලයෙකු වනු ඇත. වර්තමානයේ වයස අවුරුදු හතළිහ ඉක්මවූ පුද්ගලයින්ට තමන්ගේ විශ්රාම ජීවිතයට මෙන්ම තම දෙමව්පියන්ගේ විශ්රාම ජීවිතයට ද දායක වීමට සිදුවනු ඇත. ඒ අතරතුර තම දරුවන්ගේ වැඩිම මූල්ය බරපැන ද දරන අතරතුරය. එනිසා නිසි විශ්රාම සැලසුමක් නොමැති වීම ආර්ථික සුළිකුණාටුවකට මැදිවීමකි.
″මෙම පරම්පරාව සෑම අතින්ම මූල්ය බරින් මිරිකී ගිය පරම්පරාවක්. දෙමාපිය රැකවරණය සැලසීම, දරුවන්ගේ අධ්යාපනයට මුදල් වියදම් කිරීම, නිවාස ණය කළමනාකරණය සහ විශ්රාම සැලසුම්කරණය වැනි අභියෝග රැසක් ඔවුන් හමුවේ පවතිනවා. නිසි සැලසුමකින් තොර වීම හමුවේ සෑම විටම අවදානමට ලක්වන්නේ විශ්රාම සැලසුම්කරණයයි″, අබේනායක මහතා පෙන්වාදෙයි.
නිසි සැලසුම්කරණය
කෙසේ වුව ද යම් දුෂ්කරතාවක් මැද වුව ද, හොඳ මූල්ය විනයක් යටතේ මෙම අභියෝගයට සාර්ථකව මුහුණ දිය හැක. මෙහිදී වඩාත්ම වැදගත් දේ වන්නේ කාලයයි. එනම්, අවශ්යතාව පැනනැඟීමට පෙර සිටම ඒ වෙනුවෙන් සූදානම් වීමේ අවශ්යතාවයි. හොඳ විශ්රාම සැලසුමක ප්රධාන අංග තුනකි. පළමුවැන්න වන්නේ ඔබට ප්රමාණවත් මාසික ආදායමක් හිමිවීමයි. දෙවැන්න වන්නේ එය උද්ධමනයට ඔරොත්තු දීමයි. ඔබ දැනටමත් එකතුකර ඇති වත්කම් සහ ඔබට විශ්රාම ගැනීමේදී පැවතිය යුතු වත්කම් අතර පරතරය පියවීමට හැකිවීම තෙවැන්නයි. මෙසේ යථාර්ථවාදී විශ්රාම සැලසුම්කරණයක් කළ පළමු අවස්ථාවේදීම ඔබ පුදුමයෙන් ඇළලී යනු නිසැක ය. එය පුදුමයට පත්වීමක් මෙන්ම අවදිවීමක් ලෙස ද සැළකිය හැක. නමුත් ඔබ දැන්ම විශ්රාම සැලසුම්කරණයට එක්වීමෙන් මෙම පරතරය පියවීමට හැකිවනු ඇත.
″විශ්රාම සැලසුමක් කියන්නේ ඉතාම සංකීර්ණ දෙයක් නොවෙයි. එතැනදී වැදගත්වන්නේ තමන් තමන්ටම අවංක වීමයි. තමන්ට සැබෑවටම අවශ්ය ආදායම කුමක් ද, උද්ධමනය හමුවේ ඉතුරුකිරීම්වලට සිදුවිය හැක්කේ කුමක්ද, වර්තමාන වත්කම් සහ අනාගත වත්කම් අතර පරතරය කුමක්ද වැනි ප්රශ්නවලට අවංක පිළිතුරු සැපයීමෙන් සාර්ථක විශ්රාම සැලසුමකට එළඹීමට පුළුවන්. දැන්ම ආරම්භය ගැනීමෙන් එම පරතරය පියවාගත හැකියි″.
මෙහිදී වඩාත්ම උචිත විශ්රාම සැලසුම්කරණය ලෙස සැළකිය හැක්කේ, එක්වර විශාල මුදලක් ලබාදෙන විශ්රාම සැලසුමකට වඩා මාසිකව හෝ කාර්තුමය වශයෙන් හෝ ස්ථාවර මුදලක් සපයන විශ්රාම සැලසුමකි. ජීවිත රක්ෂණ සැලසුමක් හෝ දරුවන්ගේ අධ්යාපන රක්ෂණ සැලසුමක් වැනි විශ්රාම සැලසුමකි. ඔබ හමුවේ ඇති ගැටලුව වන්නේ එවැනි විශ්රාම සැලසුමකට ආයෝජනය කළ හැකි ද නොව එවැන්නක් නොකර සිටීමේ අවදානම ඔබට භාරගත හැකි ද යන්න ය.
ප්රමාද වී ආරම්භ වූ කතිකාවක්
ශ්රී ලංකාව මේ මොහොතේ පසුවන්නේ ඉතාම තීරණාත්මක අවස්ථාවක ය. වයස්ගත ප්රජාව වෙනුවෙන් වූ පහසුකම් යාන්ත්රණයට ඔරොත්තු නොදෙන වේගයකින් ශ්රී ලංකාවේ ජනගහනය වයස්ගත වෙමින් සිටී. මෙය හුදෙක් ආණ්ඩුවකට පමණක් විසඳිය හැකි ගැටලුවක් නොවේ. ඊට තනි තනි වශයෙන් අපගේ සහයෝගය ද අවශ්ය ය. ඒ අනුව හැකි ඉක්මණින් විශ්රාම සැලසුමකට ගමන් කිරීම අප සතු වගකීමක් ද වේ.
විශ්රාම සැලසුම්කරණය ගැන ශ්රී ලාංකිකයින් බොහෝ කාලයක් පටන් නිහඬව සිටිය ද එම නිහඬතාව බිඳදැමීමේ මොහොත එළඹී තිබේ. අපි වෘත්තීය ජීවිතය, දේපළ ආයෝජන, දරුවන්ගේ අනාගතය ආදී කරුණු ගැන දක්වන අවධානයම විශ්රාම සැලසුම්කරණය වෙත ද යොමුකළ යුතුය. මන්ද යත් විශ්රාම ජීවිතය අප සියල්ලන්ටම පොදුවූවක් බැවිනි. එකම ගැටලුව වන්නේ ඔබ ඊට සූදානම් ද යන්න පමණි.
වසර විසි දෙකක් මුළුල්ලේ ශ්රී ලංකාවේ ජීවිත රක්ෂණ ක්ෂේත්රයේ ප්රමුඛයාවන්නේ සෙලින්කෝ ලයිෆ් සමාගමයි. සෙලින්කෝ ලයිෆ් සතු ජීවිත රක්ෂණ අරමුදල රුපියල් බිලියන 200 ඉක්මවයි. 2025 වසරේදී පමණක් සමාගම ගෙවූ ප්රතිලාභවල වටිනාකම රුපියල් බිලියන 31.07කි. එවන් පසුබිමක, මෙම සමාජ උපදේශන කාර්යයට සමාගම යොමුව සිටින්නේ දශක තුනක් පුරා ශ්රී ලාංකිකයින්ගේ ඉතුරුකිරීම්, වියදම්, සැලසුම්කරණය ආදිය ගැන අතැඹුලක් සේ දැනුවත් වය.
″වසර 22ක් පුරා ජීවිත රක්ෂණ ක්ෂේත්රයේ ප්රමුඛයා ලෙස රක්ෂණ ඔප්පු අලෙවිකිරීමට එහා ගිය වගකීමක් අප සතුයි. දශක තුනක් තුළ ශ්රී ලාංකිකයින්ගේ විශ්රාම සැලසුම්කරණය තුළ ඇති අඩුපාඩු අපි අත්දුටුවා. Retirement Ready වැඩසටහන අපි ආරම්භ කළේත් ඒ පිළිබඳ සමාජය දැනුවත් කිරීම වඩාත්ම කාලීන අවශ්යතාවක් ලෙස අපි හඳුනාගත් නිසායි″, අබේනායක මහතා විස්තර කරයි.
