ශ්රී ලංකා රක්ෂණ සංගමය (IASL) විසින් සංවිධානය කරනු ලබන 2026 ශ්රී ලංකා ජාත්යන්තර රක්ෂණ සමුළුව අගෝස්තු 10 වැනි දින සිට 12 වැනි දින දක්වා කොළඹ සිනමන් ලයිෆ්හිදී පැවැත්වීමට නියමිතය. ‘අවදානම් පරිසරයක් තුල ආර්ථික විශ්වාසය ඉහළ නැංවීම වෙනුවෙන් රක්ෂණයේ සහයෝගය ලබා ගැනීම’ (Insurance as a Catalyst for Economic Confidence in a Complex Risk Landscape) යන්න තේමා කර ගනිමින් සංවිධානය කරනු ලබන මෙම සමුළුව සඳහා දේශීය හා ජාත්යන්තර රක්ෂණ නායකයින්, නීති සම්පාදකයින්, ප්රතිපත්ති සම්පාදකයින් හා රක්ෂණ ක්ෂේත්රයේ විශේෂඥයින් රැසක් එක්වීමට නියමිතය.
ශ්රී ලංකා රක්ෂණ සංගමය විසින් වාර්ෂිකව සංවිධානය කරනු ලබන සුවිශේෂී අවස්ථාවක් ලෙස හඳුන්වා දිය හැකි මෙම සමුළුව මඟින් ජාත්යන්තර රක්ෂණ සංවාද, වෘත්තීය වර්ධනය හා ක්ෂේත්රයේ සහයෝගීතාව සඳහා කලාපීය කේන්ද්රස්ථානයක් ලෙස ශ්රී ලංකාව ඔසවා තැබීමට අරමුණු කොට ගෙන ඇත. මෙහි පළමු සමුළුව 2024 වසරේදී පැවැත්වුණ අතර එහි සාර්ථකත්වය නිසාම දේශීය රක්ෂණ ක්ෂේත්රයට ගෝලීය නායකයින් සමඟ සම්බන්ධ වීමටත්, නව ප්රවණතා සහ අවදානම් කළමනාකරණ ක්රමවේදයන් හඳුනාගැනීමටත් අවස්ථාව උදා වනු ඇත.
දින තුනක් පුරා පැවැත්වෙන මෙම වැඩසටහන අගෝස්තු 10 වනදා නිල සමාරම්භක උත්සවයකින් සහ සුහද හමුවකින් ආරම්භ වන අතර ඒ තුලින් සහභාගී වන්නන්ට අදහස් හුවමාරු කර ගැනීමට, වෘත්තීය සබඳතා ගොඩනඟා ගැනීමට සහ ජාත්යන්තර සහයෝගීතාව වර්ධනය කර ගැනීමට අවස්ථාව හිමිවනු ඇත. මෙම සමාරම්භක උත්සවයේ ප්රධාන ආරාධිතයා ලෙස ඩිජිටල් ආර්ථිකය පිළිබඳ ජනාධිපති ප්රධාන උපදේශක, ආචාර්ය හාන්ස් විජයසූරිය මහතා සහභාගී වීමට නියමිතය. එමෙන්ම විශේෂ ආරාධිතයින් ලෙස ශ්රී ලංකා රක්ෂණ නියාමන කොමිෂන් සභාවේ සභාපති, ආචාර්ය අජිත් රවීන්ද්ර ද මෙල් මහතා සහ එහි අධ්යක්ෂ ජනරාල්, දමයන්ති ප්රනාන්දු මහත්මිය සහභාගී වනු ඇත.
අගෝස්තු 11 සහ 12 යන දිනවල පැවැත්වෙන වැඩසටහන් මඟින් රක්ෂණ ක්ෂේත්රයේ අනාගතයට බලපාන ප්රධාන ප්රවණතා සහ අභියෝග පිළිබඳව විශේෂ දේශන සහ කණ්ඩායම් සාකච්ඡා කිහිපයක් පැවැත්වීමට මෙහිදී කටයුතු යොදා ඇත. ඒ අනුව දේශගුණික සහ ව්යසන සඳහා ඔරොත්තු දීමේ හැකියාව, ක්ෂුද්ර රක්ෂණ මඟින් මූල්ය ඇතුළත් කිරීම් ප්රවර්ධනය, මෝටර් රථ රක්ෂණයේ අනාගතය, ඩිජිටල් තාක්ෂණික පරිවර්තනය, වෙනස් වන රක්ෂණ ව්යාපාරික ආකෘති, ජීවිත සහ සෞඛ්ය රක්ෂණ නවීකරණය, IFRS ජාත්යන්තර මූල්ය වාර්තාකරණ ප්රමිති හරහා සිදුවන වෙනස්කම් සහ ESG (පරිසර, සමාජ සහ පාලන) මූලධර්ම රක්ෂණ උපාය මාර්ගවලට එකතු කිරීම වැනි මාතෘකා රැසක් මෙහිදී සාකච්ඡාවට ලක් වනු ඇත.
ශ්රී ලංකා රක්ෂණ සංගමයේ (IASL) සභාපති ලසිත් විමලරත්න මහතා මෙම සමුළුව පිළිබඳව අදහස් දක්වමින් “ශ්රී ලංකාවේ රක්ෂණ ක්ෂේත්රය නියෝජනය කරන ප්රධානතම ආයතනය ලෙස මෙම සමුළුව නැවත වරක් ඉදිරිපත් කිරීමට ලැබීම පිළිබඳව ඉතාමත් සතුටුයි. 2026 SLIIS සමුළුව මඟින් ශ්රී ලංකාව ගෝලීය රක්ෂණ ක්ෂේත්රය තුළ දැනුම හුවමාරු කරගන්නා සහ සහයෝගීතාවයෙන් කටයුතු කරන ප්රධාන මධ්යස්ථානයක් ලෙස තවදුරටත් පිළිගැනීමට ලක් වනවා. මින් පෙර නොවූ පරිදි ව්යාපාර සහ ආර්ථිකය අභියෝගයකට ලක්ව ඇති කාල සීමාවක ක්ෂේත්රයේ පිරිස් එක්ව දැනුම බෙදාගැනීම, සාම්ප්රදායික චින්තනයෙන් බැහැර වීම සහ ඔරොත්තු දීමේ හැකියාව ශක්තිමත් කරන විසඳුම් සෙවීම අත්යවශ්ය වනවා. මෙම සමුළුව හරහා රක්ෂණ ක්ෂේත්රයේ වර්ධනයට මෙන්ම රටේ ආර්ථික විශ්වාසය සහ තිරසාර සංවර්ධනය වෙනුවෙන් දායක වීමට IASL ආයතනය කැපවී කටයුතු කරනවා.” යනුවෙන් පැවසීය.
ශ්රී ලංකා රක්ෂණ සංගමයේ (IASL) අලෙවි සහ විකුණුම් සංසදයේ සභාපති රොෂාන් පීරිස් මහතා ප්රකාශ කළේ “2026 SLIIS සමුළුවෙහි සංවිධායක මණ්ඩලය ලෙස දැනුම හුවමාරු කරගන්නා සහ ක්ෂේත්රයේ දියුණුව උදෙසා මේ ආකාරයේ ප්රමුඛ පෙළේ වැඩසටහනකට නායකත්වය දීමට ලැබීම පිළිබඳව ඉතාමත් සතුටුයි. පාරිභෝගික බලාපොරොත්තු වෙනස් වීම, ඩිජිටල් පරිවර්තනය, නව අවදානම් සහ මූල්ය ඇතුළත් කිරීම් වැනි වර්තමාන රක්ෂණ ක්ෂේත්රයේ සැබෑ තත්ත්වයන්ට මුහුණ දිය හැකි පරිදි මෙවර වැඩසටහන සකස් කර තිබෙනවා. පාරිභෝගික හැසිරීම් වේගයෙන් වෙනස් වන බැවින්, රක්ෂණ සමාගම් නිරන්තරයෙන්ම තමන්ගේ උපාය මාර්ග, නිෂ්පාදන සහ සේවා මාදිලි අලුත් කරගත යුතුයි. මෙම සමුළුවට සහභාගී වන දේශකයන් සහ සාකච්ඡා මාර්ගයෙන්, ක්ෂේත්රයේ තිරසාර වර්ධනයක් ඇති කිරීමට සහ අනාගතයට ගැළපෙන ශක්තිමත් රක්ෂණ කර්මාන්තයක් බිහි කිරීමට අවශ්ය ප්රායෝගික අදහස් ලබාදීමට අරමුණු කොට තිබෙනවා.” යනුවෙනි.
2026 SLIIS හි ව්යාපෘති සභාපති මහේන් ගුණරත්න මහතා මෙහිදී අදහස් දක්වමින් සඳහන් කර සිටියේ ගෝලීය දැනුම සහ කලාපීය අවස්ථා එකම වේදිකාවකට ගෙන ඒමට හැකි වීම මෙම සමුළුවේ ඇති ප්රධානතම ශක්තියක් බවයි. ලොව පුරා සිටින ප්රවීණ දේශකයන් සහ නියෝජිතයන් සහභාගී වන මෙම සමුළුව, ශ්රී ලංකාවේ මෙන්ම දකුණු ආසියානු කලාපීය රක්ෂණ ක්ෂේත්රයේ ඇති වර්ධන හැකියාවන් පිළිබඳ සෘජු අවබෝධයක් ලබා ගැනීමට ලැබෙන සුවිශේෂී අවස්ථාවක් බවද ඒ මහතා සඳහන් කරන ලදී. නව ව්යාපාරික සබඳතා සහ වෙළෙඳපොළ තොරතුරු සොයන ජාත්යන්තර පාර්ශවකරුවන්ට මෙය වටිනා අවස්ථාවක් වනු ඇති බව පෙන්වා දුන් ඒ මහතා මේ හරහා ශ්රී ලංකාවේ සංස්කෘතික උරුමය, ආගන්තුක සත්කාරය සහ ජාත්යන්තර ව්යාපාරික ගමනාන්තයක් ලෙස අත්කරගෙන තිබෙන ඇති ආකර්ෂණය ලෝකයට පෙන්වීමට හැකි වීම පිළිබඳව සතුටු වන බවද පැවසීය.
